نجم: ناصر مؤذن العروبة
سئل أحمد فؤاد نجم في الجزء الثاني من برنامج زيارة خاصة (قناة الجزيرة) عن عبد الناصر ومشاعره نحو الرئيس الراحل وهو الذي كتب فيه من الهجاء ما كتب وأسماه عبد الجبار.. توقفت عند ردود نجم
زارتني أمي اللي مابتعرفش تقرا ولا تكتب في السجن وعنيها حمرا.. سألتها انتي بتعيطي يامه؟ قالت أيوة. عبد الناصر مات. قلتلها يا ولية يا مجنونة بتعيطي عاللي سجن ابنك؟ قالتلي عامود الخيمة وقع يا حمار
أضاف نجم: عبد الناصر هو بلال اللي أذن في الضلمة للعروبة
عبد الناصر أمير الفقراء
أعتقد أن هذا التحول في موقف نجم يأتي بعد استيقاظ النوستالجيا العروبية مع حرب لبنان. الطريف أنه القى قصيدة التهنئة لجمال مبارك عريسنا الخفة وشحاتة المعسل وعبد الجبار. كما أثنى على نشاط الاخوان الذي اثمر 88 مقعد وقال لو مفيش تزوير كانوا أخدوا 150 مقعد – مع أنهم تقدموا ب130 مرشح فقط بس ما علينا.. في نهاية الحلقة زار نجم قبر الشيخ امام للمرة الأولى وبالتالي ثواب الزيارة من حق قناة الجزيرة.. أما قصة أنه كان مع عبد الحليم حافظ في ملجأ أيتام لمدة عشر سنوات فلم أسمع بها من قبل – حد يقدر يؤكد أو ينفي الخبر ده؟
كان نجم قد حكى في الجزء الأول عن زيارته لجنوب لبنان ولقاؤه بنصرالله
أكيد انت عارف القصيدة (زيارة إلى ضريح عبد الناصر) و دي كانت 1971 …. قصدي ان نجمم رغم سجنه لم يكره عبد الناصر و موقفه ليس بجديد بسبب ما يحدث في لبنان… هوه صحيح سخر منه بعد النكسة في قصيدة خبطنا تحت باططنا لكن نجم سليط اللسان بطبعه و النكسة كانت فاجعة للكل و كل المثقفين في وقتها فجعوا و هاجموا الظباط لكن قلة قليلة هي من أرادت رحيله أو فرحت في موته… .. و حتى الان معظم المثقفين تجدهم يساريين و يميلون لناصر و القلة من” المثقفين” ذوي الخلفيات الليبرالية الرأسمالية تجدهم ضده…
مودتي
Comment by tamer — 2006/08/28 @ 0:24
تصدقي إنتي أصلا متخلفه يا نورا
Comment by واحد — 2006/08/28 @ 1:00
هارجع أقرا زيارة لضريح عبد الناصر – شكرا يا تامر.. معلوماتي الأولية أن نجم ينتقد بشدة ولا يثني على أحد.. وفي قول آخر يهجي ولا يمدح – باستثناء جيفارا بالطبع
Comment by Nora — 2006/08/28 @ 9:29
ال بيدن مش هو الإمام.
Comment by صاحب الأشجار — 2006/08/28 @ 12:51
مش شايف أي أختلاف في موقفه علي ضوء اللي حصل..اللي أعرفه ان ده موقفه منذ زمن,و أن ده موقف أغلب المثقفين اللي عصروا التجربة الناصرية وانتقدوها بشده
لو قيمتي ناصر علي اعتبار انه زعيم كاريزمي فمهما أختلفت معايرك اكيد التقيم هيكون لصالحة
لازم نفرق ما بين ناصر كزعيم أو ديكتاتور عادل..وبين التجربة الناصرية بما يشملها حكمنا علي ناصر كسياسي
استيقاظ النوستالجيا العروبية مع حرب لبنان..أظن انه مرتبط بحدث وأثره هينحصر كالعادة مع نهاية الحدث ده ..
في حين أن واحد زي تشومسكي فسر اللي حصل علي انه نتيجة طبيعية لتدمير القومية العربية
Comment by يحي — 2006/08/29 @ 7:33
الحمد لله خبطنا تحت بطاطنا
يا محلا رجعة ضباطنا من خط النار
يا أهل مصر المحمية بالحرامية
الفول كتير والطعمية
والبر عمار
ح تقول لي “سينا”.. وما “سيناشي”.
ما تدوشناشي
ما ستميت أتوبيس ماشي
شاحنين أنفار
إيه يعني شعب في ليل ذله
ضايع كله
دا كفاية بس أما تقوله
إحنا الثوار!”
إحم
لا تعليق
إمضاء
وائل عباس الحقود ناكر جميل ناصر عليه وعلى اللي خلفوه وعلى اللي ماتوا من عيلته ومن المصريين على إيده في حروب أو معتقلات
وسلامي لبياتريس لومومبا الله يرحمه علشان بلجيكا ما رحمتهوش
Comment by وائل عباس — 2006/08/29 @ 10:07
نجم قال أنه دافع عن عبدالناصر في مؤتمر ما في دولة عربية و قال قصيدة في مدحه، و علل ذلك بأنه يرى أن نقد رؤسائنا هو من حقنا نحن فقط، و أنه اعتراضه على عبدالناصر متعلق بتقييد الحريات و المعتقلات.
Comment by ألِف — 2006/08/29 @ 17:51
تعليقاً على وائل عباس
إديني إسم زعيم مصري واحد صاحب مشروع نهضة لم يقتل و لم يسجن معارضيه…من محمد علي للخديوي اسماعيل لعبد الناصر؟؟؟
اديني اسم واحد في التاريخ العربي أو الإسلامي لم يقتل و يسجن حتى من الصحابة و الخلفاء؟؟؟؟
بلاش … إديني اسم زعيم واحد في العالم( صاحب مشروع نهضوي) لأي أمة لم يسجن و يقتل معارضيه في سبيل تحقيق هدفه النهضوي لتلك الأمة من أول ماو في الصين مروراً بكل زعماء الاتحاد السوفييتي و نابليون و غيرهم….
المشكلة اننا نحاسب ناصر بقيم القرن الواحد و عشرين اللي لو طبقناها على أبو بكر مثلاً لوجدناه ديكتاتوراً…
ناصر حكم بقيم الستينات…. ترك من وراءه جيلاُ من المثقفين و جيشاً متعلماً من الطبقة الوسطى…. أحدث ثورة صناعية لم تحدث لا من قبله و لا من بعده….. جعل للعرب هوية حقيقية يستشعرها كل مواطن أينما ذهب في العالم… ببساطة وضعهم على الخارطة….
لم يكن ناصر ملاكاً بلا أخطاء لكنه كان مخلصاً و فعل الكثير لهذا الوطن….
فاجومي من جنسنا
مالوش مره سابت
فلاح قليل الحيا
اذا الكلاب عابت
ولا يطاطيش للعدا
مهما السهام صابت
عمل حاجات معجزه
وحاجات كثير خابت
وعاش ومات وسطنا
على طبعنا ثابت
وان كان جرح قلبنا
كل الجراح طابت
ولا يطولوه العدا مهمها الامور جابت
التوقيع: تامر العقدة غير ناكر لجميل ناصر الرئيس الوحيد في العالم اللي بتحترمه الدنيا من شرقها لغربها و بيشتمه ولاد بلده…
في شعب بيكره نفسه و تاريخه زينا في الدنيا؟؟؟
Comment by tamer — 2006/08/29 @ 20:00
هاهاها
صاحب مشروع نهضة ؟؟؟
أكيد قصدك على دول العالم الثالث
لكن أكيد مش قصدك على الدول المتقدمة
لان الدول المتقدمة نهضت بدون حاجة لقمع ومصادرة راي وحجر على المعارضة
والضحايا الوحيدين في الدول المتقدمة كانوا نتيجة حروب مع دول أخرى !!!
وسلام مربع لدول العالم الرابع اللي لسه بتتكلم عن مشاريع نهضة
أصل مشروع النهضة ما يجيش غير على انقاض التعددية
والغاء الاحزاب وتقطيع المعارضين في المعتقلات
مبرر كافي لمبارك هو كمان
اه
الراجل عنده مشروع نهضة
بس احنا اللي اغبيا مش فاهمين
فمن حقه يعتقل اللي جابت ابونا !!!
Comment by وائل عباس — 2006/08/31 @ 10:00
شوف يا سيدي
القمع كان موجود في عصور النهضة و عليه أمثلة كتير زي كرومر في انجلترا و قادة الثورة الفرنسية و أسرة توكوغاوا في اليابان لكن ببساطة ده معدش مقبول في الزمن اللي احنا فيه دلوقتي
مبارك صاحب مشروع انبطاحي و الفرق بين مشروع مبارك و مشروع ناصر محتاج مساحة و وقت للنقاش حوله و إن كنت أعلم إنه لا يخفى على أحد
لما تتكلم عن ناصر و معتقلاته افتكر دايماً ان اعلام السادات و رجاله جعلوا من الأمر كأنه مذبحة جماعية و تقدير المعتقلين بشهادة الإخوان و الشيوعيين وصل الى 5000 معتقل ستة 1964 و ده كان الرقم القياسي و دايماً متنساش انها ثورة و الثورة دايماً ليها تجاوزتها (راجع الثورة الفرنسية و البلشفية و انقلاب كرومر).. و بس
ببساطة شديدة التلاتة اعتقلوا معارضيهم, و التلاتة كانوا ديكتاتوريات
بس واحد فيهم كان صاحب مشروع
و واحد فيهم كان مخلص مش حرامي
و واحد فيهم أنحاز للشعب مش لأمريكا و اسرائيل و لا للبهاوات و الانتهازيين
سيبك من اللي بيقولك الديون بسبب ناصر و الاقتصاد الفاسد و الكلام اللي الحكومة عايزانا نقوله لأن ده كلام فارغ ضد الحقيقة اللي بتقول ان معدلات التنمية كانت أعلى من 6% من 54 ل 67 و ان ناصر مات و ديون مصر 2 مليار ديون طويلة المدى و ان الاقتصاد المصري استطاع امتصاص صدمة الهزيمة على الاقتصاد بسبب قوته و ان معدلات التنمية في الستينات كانت أعلى من كوريا الجنوبية مثلاً
و غيره كتير
المهم يا وائل ان ناصر مش هوه ال 5000 معتقل و بس ناصر عمل حاجات أكتر من كده
صحيح زمنه انتهى و لا يصلح بقيمه لهذا الزمن لأن الزمن لا يعيد نفسه لكنه في زمنه فعل الكثير و لا نستطيع لومه على أفعال من جاءوا بعده اللي باعوا البلد ببلاش
Comment by tamertamer — 2006/08/31 @ 14:38
أولا مش ثورة
إسمه انقلاب عسكري بقوة السلاح
ثانيا إنت بتكلمني عن مبارك ليه ؟
إنت شايفني حاطط بادج الحزب الوطني
ثالثا ناصر ده واحد مجرم وفاجر
رابعا هل تذكر كيف خرجت المانيا من الحرب العالمية الاولى
وكيف نجح هتلر في ان يجعلها تقف على رجلها مرة ثانية
بجيش واقتصاد قوي
والبقية تعرفها
ومن الظلم والاجحاف بقى كمان انك تقارن منجزات هتلر اللي وصل لصناعة الصواريخ والقنبلة الذرية في كام سنة بعبد الناصر اللي مصانعه ما كانتش تعرف تعمل مكوة كهربا عدلة !!!
وبعدين نفسي نبطل ال 6% بتاعتكم دي
لانها ليست دليل على اي شيء
والاقتصاد خرب خراب ليس له اول ولا اخر بسبب تطبيق سياسات بعينها بالعافية وبدون تحضير ولا اعداد ولا موارد تسمح بالتطبيق
فنتج عن ذلك تعليم مهتريء وخدمات مهترئة وبطالة مقنعة وتضخم وشعب متواكل فاسد
حتى اتت الطامة الكبرى في سبعة وستين
حيث فشل العسكر فيما هم عسكر من اجله
فما بالك بحكم بلد مثل مصر ذات تاريخ وتراث وحضارة وثقافة وتقاليد
مصر ليست جمهورية موز
فيها شوية سكان اصليين وخليط مهاجرين علشان يتعمل فيها انقلاب عسكري !!!
Comment by وائل عباس — 2006/09/02 @ 10:02
ونسيت أقول لك
كفاية على السادات إنه رجع اللي الخروف بتاعك ضيعه !!!
بحرب بقى ولا بمعاهدات وسيادة ناقصة
أهي الأرض عندك مش ها تحارب تاني علشانها
قوي نفسك انت بس وانشر جيشك وحط صباعك في عين التخين
وساعتها عاوز تلغي كامب ديفيد ولا حتى كامب شيزار الغيها
أحو أحسن من الكلمنجية تلاميذ عبناصر في سوريا
بتوع جبهة الصمود والتصدي لو فاكر
اللي ما رجعوش الجولان علشان يفضلوا يتاجروا بيها على ميتين ابونا على اساس ان عندهم قضية !!!
Comment by وائل عباس — 2006/09/02 @ 10:08
الظالم ظالم ياجماعة عندو ثورةولا نهضة ولا معندوش ما في أي مبرر للاعتقالات ولا للقتل والاعدامات واي بحث عن أي مبرر هو تخلي عن الانسانية لانه اللي مات ابدا مش أقل من القاتل وله حق الحياة الانسانية مثل القاتل واكثر لو كان سيد قطب مثلا ..
Comment by amjad — 2006/11/17 @ 7:16
الله يرحم جمال عبد الناصر ويغفر له على قد ما كان بيحب البلد دي وقدم لها حاجات كتير
وقال تعالى
فأما الزيد فيذهب جفاء وأما ما ينفع الناس فيمكث في الأرض
صدق الله العظيم
Comment by د.أحمد — 2006/12/04 @ 21:46
الى يفهم معنى الجهادفى سبيل الله مش هيقول كلمة وحشة فى حق جمال عبد الناصر أنا مابدافعش عن أخطاءه ولكنى بترحم عليه الله يرحمه
Comment by اتولوستوى — 2007/02/05 @ 3:16
[…] الأعمال في تدعيم حركة الثقافة والفن ! علاقة ساويرس نجم ممتدة ومعروفة ، بدء الحديث عنها “عادل حموده” في مقال […]
Pingback by شوف تي في « الله .. الوطن .. فاطمة — 2008/06/16 @ 12:23