المصري أمس، وأول أمس
كان لدي شعور خاص بملكية هذه الجريدة.. يكفي سعادتي بها منذ صدورها الى الآن، يكفي أني أروج لها لدى معارفي في الأحياء الشعبية والمحافظات وكأني مندوب مبيعات.. وكأن اخراجها من حيز النخبة هو مسئوليتي الشخصية.. يكفي احراجي لبائعي الجرائد “معقول فيه بتاع جرايد مبيبعش المصري اليوم؟“.. كانت الجريدة الوحيدة اليومية، المستقلة، والمحترمة، تنقل أخبار حية من المحافظات، تفرد مساحات لصور جيدة وجريئة، تستضيف باقة متنوعة من كتاب الرأي، وكان عيبها الوحيد مواعيد الطباعة التي لا تواكب الحدث
صدمتني الجريدة ثلاث أربع مرات.. الأولى بوقف نشر مقالات شريف يونس كل أثنين بدون ابداء اسباب لا للكاتب ولا للقاريء.. الثانية، ترويج هوجة ميليشيات الأخوان بنشر صورة بدون تحقيق صحفي مصاحب ومحايد.. الثالثة، تغطية مغرضة ومتعمدة لوقائع قضية حق البهائيين في استخراج أوراق هوية، أصابتني أنا بشكل شخصي بالضرر.. الثالثة والرابعة ابتزاز مفكر كبير عاطفيا بعد أن أصبح عجوزا ووحيدا ليمزج أحلامه الضائعة بماضيه اللامع
الصوره التي قدم بها حوار المصري اليوم مع محمود أمين العالم كانت تليق بالدستور أو الحلوة.. ليس المصري اليوم
رغم كل ذلك لا أعتقد أن الجريدة سقطت تماما.. ألمس صراعا داخليا ما وأتمنى أن تتفوق المهنية على الحسابات الشخصية
والا سيبحث القراء عن البديل
والا سيبحث القراء عن البديل
..
هاهاهاها
Comment by Haisam — 2007/04/06 @ 18:58
من الجيد أن يبحث القراء فعلا عن ” البديل ” … ستصدر خلال أيام بعد حصولها علي الترخيص
المصري اليوم أوقفت ايضا مقالات سامر سليمان مع مقالات شريف يونس في وقت واحد
جعل هذا البعض يفكر بأن المصري اليوم لا ترحب بكتاب اليسار
و لكنها الان تعود لتنسج الاساطير حول اليسار المصري من خلال الحوار الأعجوبة
الحوار بصياغته و مانشيتاته سقطة مهنية كبيرة , لا المحاورة و لا رئيس التحرير يعلم شيئا عن اليسار أو التنظيمات الشيوعية في مصر ؟
حتي أقل المعلومات التي تعد من المعلوم من الواقع بالضرورة
رغم ذلك فالمصري اليوم جريدتي اليومية و لا أستسيغ الدستور اليومي حتي الآن
و أتمني ألا يؤثر الانحياز السياسي في ” البديل ” علي مهنيتها
Comment by عمرو عزت — 2007/04/06 @ 19:54
بصراحة هى رانيا البدوى متخلفة واتوقع منهتا اى حاجة ومنساش مقالها الغبى الى كانت بتهاجم فية المعارضة وايمن نور وحزب الغد وكفاية والاخوان وعلى كل حال ظهور صحف البديل والدستور كيومى دة شى مفيد للحراك السياسى اكتر وربنا يسهل .
Comment by دعة يمر-سووم — 2007/04/06 @ 20:12
أنا طبعا متفق معاكي تماما في طرحك بس تركيزي على حتة لمحتي ليها وقالها عمرو صراحة وهي أن المصري اليوم يبدو أنها لا ترحب بكتاب اليسار… هي الأزمة بجد أزمة توجه سياسي ولا أزمة مصداقية ومهنية؟ في أزمة “الميليشيات” كانت ضربة المصري اليوم موجهة إلى “يمين” ديني، ولما كتبوا في تغطية مفبركة لمظاهرة “عيد الشرطة” وقالوا إننا هتفنا تأييدا لمبارك كانت ضربتهم ضد النخبة الناشطة عموما وأخيرا الحوار المعجزة مع العالم وهو ضربة موجهة لليسار طبعا… أي أن مشكلتهم ليست يمين ولا يسار… المشكلة هي توجه “حكومي” محض بل وأزعم أنه توجه “أمني” ما يجعل الجريدة ومانشيتاتها و”خبطاتها” ترقص على هوى طبال ما في “لاظوغلي؟ أو في جهة سيادية أخرى… ويالتالي خلونا نشوف المشكلة صح… الناس دي أصلا لا عندها إيديولوجيا معينة ولا بتناهض إيديولوجيا تانية معينة… هي بس القضية إنها بتحاول “تلعب” مصداقية ومهنية بشكل عام وبين الحين والآخر “تلعب” مخبر ودا سر خطورة الليلة
بالنسبة للبديل فأعتقد أن أي بديل سيطرح الآن لو لم يلتزم المهنية والمصداقية اللي بجد فهيحصل الدستور والمصري وام حلاوتهم
Comment by الحاج جرجس — 2007/04/06 @ 22:15
شوفوا احنا فى مشكلة فلسفية بحتة هنا…فلنفرض مبدأيا ان الصحفية كانت انتهازية فى استدراجها للعالم بالشكل ده فى سنه المتقدم, ودا كان انطباعى عنها انا كمان…
لكن هى دلوقتى عرفت معلومة منه ومضالها كمان عالمستندات فى الآخر على حسب كلامها اللى نشرته النهارده..وسلمت فى الآخر حوارها لرئيس التحرير اللى لقى فيه الكلام الكبير اللى قريناه ده..
المشكلة دلوقتى هى: هل ينشر الكلام الكبير اللى جاله ده, وللا يخبيه عن البلد فى الدرج لإضرار مضمون الحوار بجهة ما, وفى الحالة دى اليسار؟
أنا شخصيا أفضل أعرف ايه اللى بيتقال, ومش واجب الصحافة ان كانت مستقلة فعلا انها تقرر ايه اللى نشوفه وايه اللى مانشوفوش.
حققوا فى صحة مضمون الحوار, مش فى نشرهم له ان كان فعلا الحوار مظبوط.
Comment by ٍSeneferu — 2007/04/07 @ 1:17
دعه يمر، دعنا من التجريح الشخصي.. الموضوع ليس مسئولية الصحفية وحدها.. أتفق تماما مع عمرو عزت “الحوار بصياغته ومانشيتاته سقطة مهنية كبيرة، لا المحاورة ولا رئيس التحرير يعلم شيئا عن اليسار أو التنظيمات الشيوعية في مصر؟”.. ن
Comment by Nora — 2007/04/07 @ 2:31
حاج جرجس.. كلام سليم بس أنا رأيي أن المصري اليوم مش “بتلعب”.. هشام قاسم كان ضمن التيار الدافع فعليا نحو “المهنية”، وهناك آخرون يدفعون فعليا نحو ضرب تيارات معينه -سواء يمين أو يسار- لصالح جهاز أمن الدولة للأسف وليس حتى لانحيازات شخصية.. وهناك من يريد الظهور وتلميع نفسه بأي خبطة تحدث دويا بغض النظر عن المهنية والمحتوى
Comment by Nora — 2007/04/07 @ 2:43
Seneferu
تعليقك جيد جدا لكن بياناتك مش صحيحة.. رجاء ادخال ايميل صحيح كي يتم نشر التعليق..
أنا لا أقوم بأي رقابة على التعليقات.. فقط يجب على المعلق ذكر اسم، أي اسم يختاره، وعنوان بريدي صحيح لا يتم نشره على الموقع
شكرا لمرورك
Comment by Nora — 2007/04/07 @ 2:47
النهارده هيه بتقول ان المقال متسجل وكلام تاني بيدل على انها لسه مقتنعة بصحة موقفها :
http://www.almasry-alyoum.com/article.aspx?ArticleID=53822
Comment by mohamad twfeeq — 2007/04/07 @ 8:43
صباح الخير يا نورا, صححت البيانات اهه وشكرا للنشر. سنفرو.
Comment by ٍSeneferu — 2007/04/07 @ 12:29
يا حبيبتي يا بنتي…
ده انت رومانسية بقى…
يعني انا كنت اعرف انك رومانسية الى حد ما
لكن مش للدرجة دي يا نورا
يعني
جرنال
منع كاتب
وسجن طلبة جامعة
واستدرج راجل عنده زهايمر عشان يلبس عدد هائل من المثقفين والشباب قضية فيه مؤبد
مش بس كده
ده التتمة اللي عملتها الانسة رانيا بدوي بدت كأنها بتورط امن الدولة في قضية ممكن يكون هو مش عايز يدخل فيها
كأنها بتقول لامن الدولة: عليا النعمة من نعمة ربي فيه تنظيم شوعوعي
واللبن الطاهر والختمة الشريفة انه واعي وفي كام قواه العقلية
بس انت لسة مستنية ان تتغلب المهنية
ولسة عندك امل انهم يبقوا ناس محترمة
ولسة متصورة ان كلللللللل ده مجرد سقطات
وبعدين معلش يعني الدستور ولا حتى جرنال وشوشة ممكن يكتبوا البلاغات الامنية دي
يا حبيبتي جرنال الباشا اليوم رتبة كبيرة في امن الدولة
هاااااااي
انت لسة مش واخدة بالك؟
هاتي بوسة
مووووووواه
Comment by نوارة نجم — 2007/04/07 @ 17:02
والله يا نوارة عندك حق!
ده أنا حتى معرفش ازاي نسيت اللي عملوه فيا أناشخصيا وقت قضية البهائيين. وقتها شريف عبد العزيز كتر خيره، بحسن نية بردو زيي كده، راحلهم الجرنال متوقع أنهم باحثين عن الحقيقة وهيصلحوا الخبر.. أتاريهم ناشرينه خطأ عمدا.. والست الصحفية الفذة شيماء القرنشاوي قالتلك يستاهلوا طالما بيدافعوا عن البهائيين
صحيح أنا اتكلمت في الموضوع من ناحية مهنية الجريدة وأغفلت التبعات الأمنية.. طيب ايه اللي بيحصل دلوقتي؟؟ فيه حد غير المحررة ورئيس التحرير بيشرب قهوة في لاظوغلي مع ضباط مكتب مكافحة الشيوعية؟؟
أقترح ضربة استباقية والتنسيق مع محمود أمين العالم لاتخاذ اجراء قانوني ضد الجريدة.. أمن الدولة ممكن فعلا يعمل قضية تنظيم ويبقى خلص من اليسار والاخوان في ضربتين متواليتين وريح دماغه
Comment by Nora — 2007/04/07 @ 18:07
اه صحيح ده انا ناسية انهم كتبوا عنك انك بهائية
ههههههههههههههه
بونوكيو مجدي الجلاد مرة طلع يقول: انا مش معارضة..انا مش معارضة
خلاص يا سيدي عارفين انك مش معارضة
عرفنا اننا لازم نشيل النقطة من فوق حرف الضاد لما نجيب سيرتك
بالنسبة لرفع دعوى
الحقيقة ان ح يبقى فيها تجريح للاستاذ العالم
لانه فعلا مريض وعنده زهايمر
وللاسف كان الواجب انهم يحترموا تاريخ راجل زي ده
والمفروض انه ما كانش يعرضوه لان الناس تبتدي تتكلم عليه وتحكي عن مرضه
ههههههههه
شفتي ابتديت اتكلم زيك: المفروض والواجب والاخلاق والكلام اللي بيضحك الناس ده
ومافيش اسماء معينة او محددة ذكرت في التحقيق تقدر ترفع قضية
وهي دي المصيبة
يا ريتها جابت اسماء
كانوا رفعوا قضية وخلاص
انما الصحفية الشريفة اللي كتبت تتريق على ميثاق الشرف الصحفي
سابت الحكاية عايمة
يعني اي حد ح يقول حرام عليكوا الفقر اللي الناس فيه ح يتسجن
مافيش غير ان عمال المصانع المضربين هم اللي يرفعوا قضية على الجرنال لانه بيتهم حركتهم بانها حركة شيوعية
مش عارفة اذا ده كان ممكن فعلا وللا لا
اما بقى فكرة ان شهرت ترفع مثلا قضية تتهم فيها الصحفية والجريدة باستغلال مرض والدها
فما اعتقدش يا نورا ان قلبها ح يجيبها تعمل كده في ابوها وتعرض التقارير الصحية بتاعته على الملأ
ربنا يستر عموما على قانون: احب اراقبك واحب اطاردك واحب اطرقع قفاك وخدك
احب اذلك واحب اهينك واحب طبع الكفوف في وشك
ياااااااااااا لييييييييييل
Comment by نوارة نجم — 2007/04/07 @ 18:31
سنفرو :
يعني مثلا لو واحد من رموز حركة 30 فبراير أجرت معه المصري اليوم حوار
و صرح أن تنظيم 30 فبراير به 8 ملايين عضو و نحن المسؤولون عن 11 سبتمبر
لو المحررة و رئيس التحرير نشروا الكلام ده زي ما هو , مش عملوه مانشيت و سبق , يبقوا لا مؤاخذة
ممكن ينشره في صفحة المنوعات علي أنه هزار و يحط صورة جمجمة و تنين مثلا
لكن لو عملوا الحل الاولاني يبقي لو ما كانوش لا مؤاخذة يبقوا هنود مايعرفش حاجة عن مصر و لا 30 فبراير
نوارة:
في الحقيقة أنا حاسس ان اتهام المصري اليوم بالعمالة للأمن كده قولا واحدا مش منطقي لو حطينا السوابق السيئة بجانب السوابق الكثيرة الجيدة
أنا شخصيا متفهم كون رئيس التحرير يريد ألا يصنف كمعارض
ربما هذه متطلبات كونه رئيسا لتحرير هذه الجريدة , تطلبها رأس المال
ولكن ليس بالضرورة تكون كل الجريدة عميلة للأمن
الأمن يدس أنفه في كل شيء و وراد ان يستميل صحفي او اثنان
او يؤثر علي هذا الموضوع او ذاك
و لكن مش شايف الموضوع عمالة او تبعية , بالعكس
الجرنال عمل شغل مهم و بيصب معظمه في خانة تيار التغيير , و إن كان بشكل غير مباشر
Comment by عمرو عزت — 2007/04/07 @ 21:33
يعني لو ما عنديش ماأعرفش اتحاور معاكم
وأقول رأي في تعليقاتكم ومواكبتكم للاحدث
حاجه تفرح بعد ما كنت فاكره ان الجيل الجديد كله خربان
Comment by ام هادي — 2007/04/08 @ 22:46
[…] أيضا مصرية في العموم؛ علاء عبد الفتاح ونورا يونس (هنا: http://norayounis.com/2007/04/06/226) وحسام الحملاوي (هنا: […]
Pingback by الخرز :: أخطاء قاتلة في ترجمة المصري اليوم :: July :: 2007 — 2007/07/03 @ 21:10