النهاردة اليوم العالمي لمناهضة التعذيب! الساعة 12 ظهرا قام مجموعة من نشطاء حقوق الانسان واعضاء الجمعية المصرية لمناهضة التعذيب بوقفة احتجاجية أمام قسم السيدة زينب ضد التعذيب المنهجي الذي يصحو وينام عليه المواطنون في أقسام الشرطة.. بعد خمس دقائق من بدء الوقفة هرع ضباط القسم وضباط أمن الدولة يحاولون منع التجمع الذي فوجئوا به.. د. ليلى سويف مسكت واحد منهم تفهمة.. “سيادتك النهاردة اليوم العالمي لمناهضة التعذيب.. فيه ناس واقفة نفس الوقفة دي في سبعين دولة دوقتي.. ولا أنت مش شايف بردو أن مصر فيها تعذيب؟”..ن في الأول الضابط حاول يكون سخيف ومستفز وخلاص.. وفضل يقول ده كدب وادعاءات وكلام من ده.. وجه واحد تاني زميله يقول الوقفة دي مش قانونية.. جمال عيد قال للتاني أنا محامي تعالى كلمني أنا من فضلك.. وفضلوا د. ليلى سويف وعايدة سيف الدولة مركزين مع الضابط الأولاني.. “هو مش فيه مواطن مات من التعذيب عندكم هنا في القسم ولا انت ماسمعتش عن الحكاية دي؟”.. الضابط “طيب مش انتم حبستم الضابط اللي عذبه خلاص؟ عايزين ايه تاني؟”.. هنا بقى تشجع بعض المواطنين ودخلوا في الحوار وفضلوا يقولوا للضباط حرام عليكم اللي بتعملوه في الناس.. بس دول كانوا مواطنين عندهم جرأة شويتين لأن البوليس مشى الكناسين من الشارع ونقل موقف الأوتوبيس بعيد عن مكان المظاهرة ووقف أمناء شرطة ومباحث يقولوا للناس اللي بتقرا اليفط “هششش ياللا يا ستي من هنا.. ياللا ياد أنت وهو.. المحطة بقت قدام.. بتتفرجوا على اية.. امشي يا بت لاحبسك”..ن

مظاهرة العام الماضي كانت في ميدان لاظوغلي، أمام وزارة التعذيب، تحت عنوان “باي باي عادلي.. الشعب جاي يودعك”..ن

طبعا فاتت سنة وتفجرت شرم الشيخ، ثم دهب، وتوغل تنظيم المختلين عقليا اللي الواحد منهم قد الكف ويقتل مية وألف وانتشروا من منازل الأسر النائمة في صعيد مصر الى كنائس الأسكندرية.. أشرف لواءات الداخلية على البلطجية المأجورين للتحرش جنسيا بالناشطات السياسيات والمواطنات العاديات المعارضات لتعديل الدستور اللي كدة وكدة.. وقمعت قوات مكافحة الشغب عشرات التظاهرات السلمية المطالبة بالاصلاح السياسي والحقوق المدنية.. تم خطف آلاف النشطاء من الشوارع وضربهم وسحلهم ثم عرضهم علي نيابة غير مستقله ومتواطئة قبل ايداعهم سجون تدار بهدف التربح وتتلاعب بحقوق السجناء لصالح جهاز أمن الدولة.. كل ده طبعا غير التعذيب المنهجي في أقسام الشرطة ومقار أمن الدولة سواء لانتزاع اعترافات أو تتبع مسروقات أو تقفيل محاضر وملفات أو حتى تحت بند المجاملات.. بردو في لاظ أوغلي الناس لبعضيها

 طبعا لما تشوفوا الصور هتسألوا هما فين المواطنين دول؟ لسة فيه صور في كارت الذاكرة اللي في كاميرا علاء.. هيبعتهملي أو هينشرهم أو الاتنين.. ابقوا معنا

ماحدش بيتعلم ببلاش.. مطلب اقالة وزير الداخلية، ووقف التعذيب، وحل جهاز الأمن المركزي مش بالسهولة دي في بلد زي مصر.. دي كانت أحلام حسينا أنها قريبة قوي السنة اللي فاتت.. لكن الأطول نفسا كانوا الأقدم في المعركة.. يعني المتظاهرين عددهم صحيح قليل جدا مايزيدش عن خمستاشر لكن بيمثلوا منظمات حقوق الانسان المختلفة.. (صحيح افتقدنا حسام بهجت – المبادرة المصرية للحقوق الشخصية – بس أنا قلت أكيد مسافر) وكمان اختيار المكان له دلالة عالية.. أقسام الشرطة دي من ناحية بتحصل فيها بلاوي وبيمارس فيها التعذيب (مثلا تجربة تعذيب شرقاوي في قسم قصر النيل) وفيه مواطنين بيموتوا داخل الأقسام، لكن رغم كل ده بيفضل قسم الشرطة يمثل تابوو يخاف الناس الاعتراض عليه أو الاقتراب منه.. قسم السيدة زي أقسام كتير غيره في منطقته مكروه جدا من الناس وبالتالي يمكن خطوة التظاهر عند القسم تشجع الناس يعملوا حاجة لو أبن أو أخ أو قريب اتعذب داخل القسم بعد كدة  

د. عايدة دخلت مناقشة جدية مع الضابط اللي في الصورة دة.. ظلت ردوده مقتضبة جدا بينما جادلت هي ماذا سيكون موقفه هو شخصيا بعد أن ينهار نظام مبارك وتنكشف الملفات؟ وأعطته نماذج من عدة دول تم محاكمة من يقومون بالتعذيب فيها بعد انهيار النظام الداعم لهم

مثل هذه المواجهات مهمة جدا ومفيدة جدا من حين الى آخر.. قد تظنوها سذاجة مني.. ولكن شيئا ما يقول لي أنهم ينصتون.. ومثلنا تماما يتسائلون عن الخطوة القادمة.. وعن كباش الفداء التي ستقدم في حال كان الاصلاح غير حقيقي – وهو الاحتمال الأقرب

يبقى العادلي! ولكن ليس الى الأبد.. ليك يوم يا ظالم ولا دايم الا وجه الله