منعم خرج فقلت آخد أجازة أنا بقى
سافرت أمريكا في نهاية يناير 2007 وحصلت في مصر حاجات كتير وأنا هناك.. قضية حجب المدونات، واعتقال منعم، وتعديل الدستور، وتفاقم احالة المدنيين للمحاكم العسكرية، والانتفاضة العمالية، واغلاق دار الخدمات النقابية.. كل الأحداث دي واحساسي بالعجز حتى عن التواصل مع الناس وانا بره مصر خلاني لازقة -لأول مرة- في الكمبيوتر بتاعي.. يمكن عمري ما كنت باكتب أو باتابع المدونات والأخبار قد ما كنت باكتب وباتابع في أمريكا.. طبعا ساعد في ده ان كل زقاق في واشنطن فيه واي فاي غالبا مجاني.. الميادين الرئيسية والحدائق فيها انترنت ببلاش وكذلك الجامعات والمحاكم والمتاحف ومعظم المقاهي والمطاعم
بعد اعتقال منعم، عمرو غربية جر رجلي في حملة التضامن الدولية اللي كانت بدأت بالفعل بسامي غربية، ومالك، واستروبال، وماري.. شوية وقالولي عايزينك تبقي منسق الحملة.. قلتلهم يهديكم يرضيكم أنا أصلا على قدي جدا فيما يتعلق بالتكنولوجيا والانترنت وتقنيات النشر والكلام ده قالولي الموضوع سهل خالص واحنا معاكي
المهم، عملنا كام اجتماع وكام محادثة مجانية عابرة للقارات عبر سكايب وشوية شوية انضم للحملة ناس كتير منهم احمد عبد الحافظ وخالد حمزة ومحمود سعيد وغيرهم
كان فيه ناس بتترجم، وناس بتنشر، وناس بتعمل فيديوهات، وناس بتتابع الأخبار، وناس بتعمل اتصالات اعلامية ودولية.. النوع ده من الشغل مع ناس عمري ما قابلتهم قبل كدة كان تجربة جديدة جدا بالنسبة لي.. واتأكدت عندي حاجات مهمة: التنظيم مش تهمة بل حق أساسي وحس موجود بالفطرة عند أي بني آدم، والانترنت دي نعمة ميقللش من مقدارها غير الكافر والظالم واللي بالي بالك.. سهل جدا أي واحد يبدأ حملة لأي قضية هو مؤمن بيها ويلاقي ناس تشاركه وتحشد معاه عبر العالم
لما رجعت مصر يوم السبت اللي فات طبعا طرت من السعادة لما لقيت علاء ومنال مستنييني مع أهلي في المطار.. أول خبر علاء قالهولي “منعم خرج من كام ساعة” وطلبه على التليفون ولقيت منعم كالعادة صوته فرحان
لكل اللي سألوني ليه مكتبتش خبر خروج منعم، بصراحة تعبت وقلت آخد أجازة كام يوم من النت والبلوج والأخبار.. أهلي وأصحابي وحشوني
بعد ما شميت نفسي كام يوم دلوقتي أقدر أقول حمد الله عالسلامة يا منعم وباشكر كل الناس اللي ساعدوا في الحملة واشتغلوا فيها بشكل فردي وتلقائي وكتبوا عن منعم وليه ونشروا على مدوناتهم
صحيح الحملة مش هي سبب خروج منعم الوحيد، وعلى رأي علاء سيف، المعتقل السابق، مفيش أي سبب وحيد لخروج أي معتقل.. لكن قناعتي الشخصية أن حجم الاهتمام بأي معتقل بيضمن سلامته وبيشكل ضغط على اخواننا البعداء
منعم كسب اجماع واسع من تيارات وخلفيات متعددة بسبب انسانيته الشديدة والتزامه بقيم الحرية حتى لمن يختلف معهم.. أعتقد أن ده مش سهل وبيحتاج شغل كتير من أي ناشط أو صاحب رأي.. لكن عشان منعم تعب مع نفسه في الأول لقى ناس كتير تقف له في الآخر
في الحقيقة أنا اللي باشكر منعم أنه عرفني على ناس جدعان جدا اتعلمت منهم حاجات كتير، وعرفني كمان على مجموعة أوسع من الأصوات الحرة داخل الاخوان
دلوقتي بقى هناك خطر أكبر قادم وعلينا الانتباه.. قضية حجب 50 موقع ومدونة، ومأساة استنزاف المدونين في قضايا ملفقة واجبارهم على الرقابة الذاتية.. كلها خطوات تمهد الطريق الى خطر قادم وهو اصدار تشريع ضد حرية الانترنت
ياللا بينا على الجولة التانية؟؟
حمد الله على السلامه كنّا قلقانين عليكي
و الحمد لله على وصولك مصر جيتي نورتيها و جبتى الاخبار الجامده معاكي 😀
و احب ان اعرفك اننك اتورطي لان اي حمله قادمه لا اعتقد انها ممكن تكون حمله متكامله بدون حضورك و تضامنك
& as a welcome back i sent u an email plz check it & tell what we can do 😀
Comment by يساري مصري — 2007/06/06 @ 18:56
حمد الله ع السلامة
مش هتيجي بكرة قضية عماد الكبير؟؟؟
غالبا النطق بالحك ممكن يكون بكرة
حمد الله ع السلامة
Comment by مراقب مصري — 2007/06/06 @ 19:32
As you mention it, Internet is a fantastic tool that allows people to meet and work together. Not along go (and still in many countries) the simple fact of such meeting to defend freedom of expression was a crime of what they call:
جمعية غير مرخص بها هدفها الإعتداء على أمن الدولة
Sadly, too many people still jailed for such bullshit. And in such case, the worst isn’t that they are jailed, but the silence that is kept around them.
All of us, we were so happy when Monem was released. But still Kareem (Egypt), M. Abbou (Tunisia) and many many others that do deserve a small space on our blogs to spread the world about their tragedy.
Thank you Nora for the fantastic job you’ve done at Freemonem, and I hope we will still work together for other issues … to defend our rights to freedom of expression.
Sincerely Astrubal
Comment by Astrubal — 2007/06/06 @ 20:56
حمدالله على السلامة .. 🙂
Comment by يوسف — 2007/06/07 @ 0:06
ايوا يا نورا اجازه بقي وثني ومد وريلكسيشن
نورتي مصر بجد
عاوزين نشوفك في المحكمه يوم السبت بقي لان الجوله التانيه دي اصعب واقوي وعاوزه النفس الطويل
ومتنسيش الصاجات 😉
Comment by shaimaa — 2007/06/07 @ 2:01
لا والنبي يا عبدوو
😉
Comment by Nora — 2007/06/07 @ 11:12
الواحد شكله وقع وسط … مجموعة إعلامجية بجد …
طيب ابقوا خدونا وراكم في العربية حتي يا جماعة …..
Comment by محمد السيد — 2007/06/07 @ 14:36
نورا فعلا انا عاجز علي توجيه الشكر ليكي ولكل من شارك
وسعادتي الكبيرة مش بالافراج يمكن لاني اتعودت علي السجن والظلم
سعادتي الكبيرة هي مساحات الحب والود اللي وجدتها من ناس كتير جدا فوق ما كن اتخيل
انا لحد دلؤتي بتجيلي تليفونات وناس تقولي انت متعرفناش لكن احنا تضامنا معك
قد ايه انا اسير هذه الحالة
كلمات الشكر لا تكفي
لكن في حاجة تانية اذا كانت الحملة نجحت في اخراج واحد اسمه عبدالمنعم
لكن فيه الاف محتاجين الحملة دي عشان يخرجوا من السجون
وفيه شعب كامل كمان مستني حملة تخلصه من اللي هو فيه
Comment by عبدالمنعم محمود — 2007/06/07 @ 18:39
طبعاً انا لازم أقول أنى من أسعد الناس أنى شاركت واتعرفت على ناس زيكم
يمكن مكانش ليا دور تقريباً (دور صغير)
بس بالتأكيد اتعلمت من كل واحد فى الفريق حاجة استفدتها منه
وكفاية بقى وادعوا لى بقى علشان عندى امتحانات 🙂
Comment by محمود سعيد — 2007/06/09 @ 0:56
حمد لله على سلامتك يا نوراااا…. معلش متأخرة شوية….
Comment by Mariam — 2007/06/14 @ 3:20