ماتحاسبونيش أنا أخدت كام صوت ودخلت المجلس ولا لأ، حاسبوني لو ما استمريتش في امبابة بعد هوجة البرلمان ما تنفض.. حاسبوني لو أول مظاهرة لكفاية بعد الانتخابات ماطلعتش من قلب امبابة.. امبابة المصانع.. وامبابة المعتقلين.. وامبابة الفقراء والكادحين

احنا فقراء، ومعندناش فلوس نعمل صوان ومؤتمرات وبوابات خشبية.. والمعركة قصيرة.. كل اللي قدامنا 17 يوم.. وعشان كدة احنا هندير معركتنا بشكل مختلف.. هنعمل مؤتمرات متحركة ومسيرات في كل شوارع وحواري امبابة.. كل اللي انا محتاجه سلم خشب.. كل كام متر هاطلع عليه واكلم الناس.. الخارطة معانا.. وخطابنا واضح.. احنا ضد الديكتاتور مبارك وهنقولها بشكل مباشر.. مش هنحاول نخفف حدة الكلام عشان نحصل على أصوات