تششك
لم أكن أعرف مدى تعلقي بالصحافة الفوتوغرافية حتى صباح الأحد الماضي.. وقفت وسط قيادات أمنية على رصيف مجلس الوزراء المقابل للبرلمان المصري الذي تم تطويقه بحشود أمنية وفرق البلطجية.. على الرصيف المقابل صفوف من الخوذات السوداء يئن تحتها جنود كلحت بشرتهم من حرارة الصيف.. تطل من فوق الخوذات مائة رأس لصحافيين محشورين في أمتار قليلة فوق الرصيف بين الجنود وسور البرلمان.. يحملون قلما كبيرا من الورق المقوى مكبل بالسلاسل ويحملون لافتات خط عليها “تسقط الصحافة.. يحيا الفساد”.. بتلقائية من يدير محرك سيارته صباح كل يوم دسست يدي في حقيبتي، وتحسست الحافظة السوداء الصغيرة وأخرجت منها الكاميرا التي لازمتني طوال عام وأكثر.. ضغطت زر الباور.. ضبطت الكادر.. نعم هذا ما أراه وأريد أن يراه آخرون معي.. ضغطت بأصبعي زر الالتقاط.. سمعت الصوت المعتاد “تششك” فتح الشاتل وأغلق ولكن ظهر لي علامة ايرور على الشاشة.. الكاميرا لا ترى كارت الذاكرة.. حاولت معها ومع الكارت عدة مرات.. مفيش فايدة.. لقد امتنعت هي أيضا عن العمل تضامنا مع حرية الصحافة المنتهكة
عبرت الشارع، اتحشرت داخل المظاهرة، تحدثت مع الأستاذ جلال عارف وعضو اخواني بالبرلمان.. حييت جمال عيد ثم قررت أن أرحل.. شعرت بأن شيئا أساسيا جدا ينقصني.. وبأنه مهما كتبت عن الحدث لا يكتمل ادراكي له وتفاعلي معه بدون صورة
في التاكسي أمسكت بالكاميرا مجددا.. الآن فقط تذكرت أنها السبب في انشائي لهذه المدونة.. كي أنشر الصور التي التقطها.. وأنها أيضا السبب في تعرفي على النشطاء السياسيين.. فقد كنت أذهب لالتقاط صورهم حتى صرت منهم.. وأنها رافقتني في الخاص والعام.. الآن فقط أدركت.. أنا أعشق الصحافة الفوتوغرافية
علاء سيف، منه لله، يوم خروجه من السجن صورته مع منال.. بعد ما ضحك للعدسة بص للكاميرا وقاللي “هي الكاميرا دي ما اتصادرتش وما اتكسرتش قبل كدة؟”.. لا يا سيدي.. لسة
قرك دكر
hehehe مش اتفقنا الكاميرا هي المكان اللي بنشيل فيه روحنا
Comment by Alaa — 2006/07/11 @ 3:58
اه و على فكرة، الشاتر أصلا ملوش صوت هما عاملينله صوت كده عشان يحسسوكي بحميمة بس ينفع تلغيه
Comment by Alaa — 2006/07/11 @ 3:59
ايام احداث اسكندريه .. كنت محصور وسط دايره من الامن والاقباط الغاضبين .. كنت محتاج الكاميرا بشكل بشع .. اتصلت بواحده مصريه مخصوص على اساس انها ممكن تكون في المكان و معاها كاميرا .ز بس طلعت في سينا .. حسيت فعلا ان ناقصلي حاجه مهمه .. و كنت بحسد اي واحد واقف معاه حتى كاميرا في موبايله .. المشكله ان الكاميرا بتبقى موجوده في لحظات مش مهمه تماما .. انا مثلا مصور نفسي ييجي ميتين صوره في البيت عشان ماتصديش :-))
Comment by haisam — 2006/07/11 @ 11:52
لا يا نورا … الهدف من السجن مش بس العزله … دي مجرد مقدمه … افتتاحيه … الهدف هو كسرك بكل ما تعني الكلمه من معاني … ولما تتكسر كل ما تحتويه من معاني و قيم و ثوابت … حيقع في الارض … و حتي لو حاولتي بعد كده ترممي المكسور حتلاقي شرخ هنا و شرخ هناك لسه بينزوا …
باكلمك عن تجربه طويله و مره … من السبعينات و هندسة اسكندريه وما يزيد مجموعه عن اربعتاشرسنه في معتقلات المحروسه ..
ربنا يصبر الشرقاوي و من معه و يجازيهم خيرا ان شاء
Comment by Aiman — 2006/07/11 @ 14:54
يا جار القمر.. المشكلة أن انا الكاميرا ما يتـفارقشي شنطتي.. يعني على طول حاسه ان فيه حاجات كتير تتصور.. واختفائها دلوقتي عاملي خلل كبير بصراحة.. لكن عندك حق.. يوم الكنسية كان محتاج كاميرا فعلا.. من موقعك أكيد كان فيه كادرات كتير حلوة ومعبرة
Comment by Nora — 2006/07/11 @ 18:06
فعلا الكاميرا فى حياتنا شئ مهم جدا والكاميرا ممكن يكون ليها دور كبير جدا فى اظهار الواقع للناس والحد من نشر الفساد
Comment by heromas — 2007/03/05 @ 2:23