16 Comments »

1. الجيش العربى له هدف واحد بس دلوقتى هو قمع الشعوب العربيه
   احنا اصبحنا محتلين عن طريق حكامنا لان الغرب مش عايز يحتلنا بقواته لتكلفه الاحتلال فبالتالى الاحسن انه يحتلنا بجيوشنا

   Comment by مصرى — 2006/07/24 @ 17:01

2. لسة يا نورا مش عارفة إسرائيل عدو والا ﻷ?

   Comment by صاحب الأشجار — 2006/07/24 @ 17:07

3. أنا رديت عليك في نفس الرابط اللي أشرت ليه يا عمرو

   على فكرة كنا بنتكلم مع علاء ووائل الأسبوع اللي فات في الحاجة الي تجديد الموقف وأبجديات الصراع لأنه مش هينفع أنه يفضل يتناقل ويتوارث عبر الأجال بدون مناقشة وتحديث فهذا يعني وفاته

   الجمعة الماضية في مظاهرة الأزهر داخل مسجد السيدات الأغلبية العظمى من الغير مسيسات أعترضن على الهتافات التي بدأت بعد الصلاة مباشرة ومنهن من قالت واحنا مالنا ومن هن من اتهمت المتظاهرات باستغلال المسجد ومنهن من خرجت مسرعة لتتجنب الاختلاط بالمتظاهرات انطلاقا من مبدأ احنا جايين نصلي وبس

   لما دخلنا ساحة الأزهر وانضممنا الى الرجال كانت هناك هتافات من نوعية لا اله الا الله اليهود أعداء الله – وخيبر خيبر يا يهود جيش محمد سوف يعود – والجهاد هو الحل شرع الله عز وجل

   أبو مهدي مثلا سائق تاكسي فلسطيني في القدس شايف أنه الوضع لازم يستمر كما هو واليهود لازم يستمروا في الاحتلال لغاية يوم القيامة حين تأتيهم الهزيمة وتوشي بهم الأشجار التي يختبئون خلفها وما على العرب الا الصبر

   من ناحية تانية بقى التضامن الشعبي مع اللبنانيين لم يرقى الى المستوى حتى الآن.. تفتكر ليه؟

   Comment by Nora — 2006/07/24 @ 17:48

4. أنا باسألك على رأيك انت مش رأي الإخوان المسلمين. أنا ما لقتش حاجة في الرابط غير “لخبطة داخلية” نشأت بعد سفرك إلى لبنان. إنت رأيك إيه بقى؟

   معك حق إن التضامن لم يرق لما هو مطلوب.

   Comment by صاحب الأشجار — 2006/07/24 @ 19:02

5. اقرا كويس.. بالمناسبة دول ماكانوش الاخوان.. بالأغلب الهتافات دي كانت من حزب العمل.. أما أبو مهدي فهو مش في حماس ولا الجبهة الشعبية هو فقط مراقب 

   Comment by Nora — 2006/07/24 @ 19:05

6. بداية الشاعر هو محمد بهجت، و الحلقة دي على ما أذكر من العاشرة مساء أذيعت من كام شهر، لكن طبعا الكلام جاي دلوقت ع الجرح.. زي مشهد محمود الجندي في فيلم ناجي العلي و هو بيسأل عن الجيوش العربية و قذائف إسرائيل نازلة زي المطر على صيدا في 1982

   بالمناسبة، السعودية بتشتري سلاح اليومين دول من فرنسا ب3 مليار دولار، غالبا لزوم رحلات الصيد. و السعودية برضه غالبا هي اللي حتدفع فاتورة إعادة إعمار لبنان، و غالبا برضه مفيش حد حيدفع مليم أحمر لتسليح الدفاع الجوي اللبناني، و ربنا ما يقطع لنا عادة

   Comment by minesweeper — 2006/07/25 @ 1:55

7. الحوار كان على الحاجة لاقناع الناس بمواقفنا أكتر من كونه عن كراجعة مواقفنا (غرور بقى تقولي ايه، أحنا مواقفنا مش محتاجة مراجعة أبدا).

   المشكلة أننا تعاملنا مع حاجات على أنها بديهيات و مسلمات، و استخدمنا أو تغاضينا عن من يستخدم خطاب اقصائي بيستهتر بمن لا يؤمن بالمسلمات دي، المرة دي اتعلمت الدرس، أصدقاء كتار بحترمهم مختلفين معايا تماما، و دي حاجة محتاجة وقفة.

   لكن لازلت شايف أن الوقفة لمراجعة الخطاب و الطرح مش لمراجعة المواقف الأساسية.

   اسرائيل عدو و الصراع العربي الاسرائيلي حقيقي و مهواش صراع فلسطيني فقط أو لبناني فقط (و مهواش عربي بس، ايران طرف فيه مثلا و الصراع جزء من صراع الانسانية ضد الامبريالية و الكلام الكبير ده كله و يا ريت ناخد بالنا)، و الصراع صراع بقاء مش تهريج و الصراع في قلب أسباب تدهور و تأخر مصر و من أهم أسباب بقاء النظام المصري و تسلطه، و مش هيتحل بكلام رومانسي عن نبذ الحرب و بجمع تبرعات هيتحل بمقاومة شرسة، مسلحة في الأراضي المحتلة و ربما على حدودها و مقاومة غير مسلحة لكن شرسة برضه (بتمارس الاضراب و بتشتبك مع الأمن و بتبذل الأرواح بالكبشة و مهيمهاش و هكذا) في الأراضي الغير محتلة.

   بس الكلمتين دول لو قعدت أرددهم و السلام هطفش الناس، محتاجين نراجع بتعبر عنهم ازاي، و محتاجين نراجع بنعامل من لا يؤمن بيهم ازاي (اتفرج مثلا على البتاع اللي أسمه زنجي اللي كل ما حد يقول كلمة ضد المقاومة تلاقيه بيقول للناس دور على اللي اغتصبك و روح شفلك طبيب نفسي و بلاوي من دي).

   Comment by Alaa — 2006/07/25 @ 4:13

8. بمناسبة تطفيش الناس والفقرة الأخيرة في تعليق علاء، أنا شايفة أن سبب ضعف دعم الشارع المصري للمقاومة اللبنانية مش بس الخوف من الأمن المركزي والبهدلة.. يعني الناس بمعنى كلمة الناس نزلت ميدان التحرير يوم غزو العراق في حين ان اللي اتجمعوا في الأزهر باستثناء الاخوان كانوا فقط 400 مسيسين وكمان مش منسقين مع بعض

   نرجع للفكرة، ضعف المشاركة متهيألي سببه أن الناس فعلا مش عايزة حرب، وانها مازالت مكتئبة من احتلال العراق، ومش واخدة موقف واضح من تبعات هزيمة أو نصر المقاومة اللبنانية لكن من ناحية تانية كلهم متعاطفين وعندهم استعداد يشتبكوا مع الكارثة الانسانية في لبنان

   بمعنى آخر ستكون هناك فرصة أكبر لتفعيل حركة ضد الحرب، ومن أجل وقف فوري لاطلاق النار، وجمع تبرعات ومساعدات انسانية للبنان، في مقابل تظاهرات تدعو الى عودة جيش محمد، وتدمير تل أبيب، وفتح باب الجهاد، وسقوط مبارك وملوك السعودية والأردن، والاشتباك مع الأمن المركزي

   وبما أن الحركة بركة يبقى تفعيل حركة سقفها واطي دلوقتي أفضل من لا شيء على الاطلاق.. واذا يعني سرحت بخيالي وكنت متفائلة هاقول كمان أن الحركة دي لو جمعت عدد أكبر من الناس وشجعتهم على المشاركة والاشتباك والتنظيم ده هيكون مكسب على المدى البعيد.. وخصوصا أن الحرب شكلها هتطول.. باين كدة أن حتى اجتماع روما لن يأتي بجديد ولن يوقف اطلاق النار

   Comment by Nora — 2006/07/25 @ 13:05

9. […] كنت قد تسائلت منذ يومين في تدوينة سابقة عن وضع الجبش المصري وامكانيات الدخول في حرب سواء كانت باختيار مصر أو فرضت عليها […]

   Pingback by Nora Younis » مفيش حرب، لكن فيه ترقيات للداخلية — 2006/07/26 @ 16:20

10. ممكن كلامك يكون صح بس مش عارف ده علاقته ايه بمظاهرات مارس 2003 المظاهرات دي سقفها كان عالي و الجماهير اللي شاركت طلع سقفها أعلى و شتمت مبارك قبل ما أي واحد فينا يستجرأ يفكر فيها.

    أشك في قدرة أي شخص على تحليل و قرائة الجماهير، أحنا حمير و عميان و كل اللي نقدر عليه أننا نجرب حاجات مختلفة و نشوف ايه اللي هيجيب نتيجة.

    Comment by Alaa — 2006/07/27 @ 4:31

11. المقارنة بين مظاهرات مارس 2003 كرد فعل لغزو أمريكي ومظاهرات دلوقتي كرد فعل لغزو اسرائيلي هي أن الناس نفسها قصير قوي وبعد ما عملت أقصى ما عندها (فعلا) يوم غزو العراق بردو مقدرتش تحقق حاجة.. لا مبارك مشي، ولا جمال خرج من سيناريو التوريث، ولا علاء تخلى عن البيزنيس، ولا توقف الغزو ولا حاجة خالص

    باكرر أن ده لأن الناس للأسف نفسها قصير

    Comment by Nora — 2006/07/27 @ 17:12

12. الأستاذة الفاضلة … نورا هانم

    السلام عليكم ورحمة الله
    بالإشارة إلى قصيدة 1-2 الجيش العربى فين للشاعر محمد بهجت أرجوكى أن تساعدينى فى العثور على كتايه أو ديوانه حيث أننى مقيم فى السعودية وحاولت خلال أجازتى السنوية البحث عن أى كتاب يخص هذا الشاعر أو حتى الجريدة التى يكتب فيها ولكن للأسف لم أتمكن من ذلك … الراجل ده على أد ما أضحكنى من خلال طريقة أدائه للقصيدة إلا أنه فى نفس الوقت أبكانى على حالنا وما وصلت إليه صورتنا كعرب أمام العالم الله يرحم شهداء لبنان وقانا رقم 2 إننى أتألم وأعتصر حزننأ على مشاعد المذابح التى تطل علينا كل ساعة على شاشات الأخبار فعلآ هو الجيش العربى فين إحنا العرب فين أنا لا أفتخر كونى عربى أنا فى عذاب دائم ولا أملك غير الدعاء بأن يرحمنا الله من أنظمتنا أو أن نموت ونلقى وجه ربنا لنحاسب أشد عذاب على صمتنا وهواننا

    ساموحونى على نظرتى المتشائمة لكن ما أفعل أرجوكم ساعدونى لكى أتخلص من تشائمى

    أخوكم /د. محمد سيف الدين

    Comment by Mohamed saif el din — 2006/07/30 @ 16:27

13. واحد اثنين
    الجيش العربي فين

    الجيش العربي تعبان
    واخد علي قفاه من زمان

    واحد اثنين
    الجيش العربي فين

    الجيش العربي نيمان
    و عمال يلدغ لبان

    و الريس و الملك من زمان
    باعوا القضيه للامريكان
    وسابوا الجيش عريان

    واحد اثنين الجيش
    العربي فين

    Comment by عربي غاضب — 2006/08/17 @ 12:59

14. ارجو من لاخ اللى بيعقب على الجيش المصرى اكيد مدخلش الجيش او اخدها حمره ان رسول الله صلى الله عليه وسلم \ قال ان فتح الله عليكم مصر فاخزو منها جند كثيفا فهم خير اجناد الارض واحمد الله انى خدمت فى الجيش مثل ابى و جدى يارب اشوف اولادى والحمد لله انك وللى شبهك مش جواه متخازلون ووجبناء اخرك تمشى فى مظاهره مع البنات والحريم

    Comment by ممممحارب — 2008/02/18 @ 6:36

15. متى عيد الجيش؟؟؟؟؟ please answer

    Comment by allexandra micheall — 2008/03/04 @ 20:03

16. الجيوش العربية بيفرحها الاكل والنوم اكتر من سماع اخبار الحرب مش الحرب نفسها العرب دولة عايزين هدف قو مى يسعو وراءة هدف يفرض عليهم مهما كان هذا الهدف حتى ولو كان محاربة ايران فيجب ان يجربو التضامن اولا حتى يخرج الرعب من قلوبهم ولا تنتظر جيش بدون اقتصاد والعرب معظم اقتصادياتهم هشة غير قائمة على التصنيع فهى قائمة على المواد الخام والصناعات التحويلية على استحياء لابد ان نقتنع لا اقتصاد قوى لا قوةيطول الكلام ولكن اختم ندعى الله بان يهدى عبدة الكراسى

    Comment by بودا — 2008/09/21 @ 9:46

تلقيمة التعليقات على هذه التدوينة

علِّق على التدوينة