ليه الثورة ما قامتش لحد دا الوقت؟
ليه المثقفين واللي شغالين في السياسة عامة والاخوان هما اللي دمهم محروق وجالهم ضغط وسكر من التعديلات الدستورية بينما السواد الأعظم من الشعب قاعد ع القهوة أو في الحمام؟
المصيبة أن خطاب المعارضة كله خطاب مثقف مركز على قضايا الحريات والانتخابات والمواطنة. التي مع التسليم بأهميتها، أصبحت ترف لا يحلم به المواطن المصري اللي بياخد على قفاه في الشارع قدام زوجته وأولاده من أمين شرطة ميسواش تلاتة تعريفة أو بياخد حاجة تانية في مؤخرته داخل قسم شرطة ويمكن كمان يصوروه فيديو
بلوجر كفاية حرام بيفكرنا بالبعد الاقتصادي للتعديلات الدستورية الجديدة اللي بيلمس حياة الناس بشكل مباشر ويا ريت الاعلام المستقل والمعارضة يركزوا شوية ع الجزئية دي: ن
طب هو إيه مشكلة التعديلات اللي بنقول عليها تشويهات دي؟سيبكم طبعا من إن التعديلات هتنسف كل ما يسمى بالمكاسب الاشتراكية التي اكتسبناها في انقلاب يوليو 52 وطبعا أنا راجل ليبرالي بورجوازي مش فارقة معايا الجزئية بتاعة المكاسب الاشتراكية دي اللي هتخلي الفلاحين والعمال من هنا ورايح حشرات ونفاية بشرية كما كانوا في حجمهم الطبيعي قبل الانقلاب بتاع 52 وبحكم الدستور المشوه الجديد العمال والفلاحين دول بقى يروحوا ينتبهوا لشغلهم سواء في مصانع طبقة الأغنياء الجدد أو في إقطاعياتهم الزراعية كأجراء وعبيد بيشتغلوا عند ساداتهم وما ينساش أي كلب فيهم نفسه ويروح يلعب سياسة و يمثل دايرته… خلاص كان زمان وجبر… وأما التعليم المجاني محدود الجودة فدا خلاص برضه بموجب التشويهات الدستورية مش هيبقى موجود وكله هيبقى تعليم عالي الجودة من هنا ورايح ومش هيتعلم غير الناس الكلاس والشباب الاستايل أما العيال البيئة الرمة أولاد الكلب اولاد بقية الشعب فدول يغوروا ف داهية يروحوا يتعلموا صنعه في أي ورشة ولا في أي مغلق خشب ولا يموتوا أحسن لأنهم مش نضاف أساسا وريحتهم وحشة
عشان زى ما قولتى يا نورا
المواطن ده غلبان و مصغوط و كل اللى بقى بتمناه و بيحفى عليه
انه بعرف يعيش هو اولاده
و عارف ان لا حول ليه ولا قوه وسط الغيلان
مشكله المعارضه انها بتستخدم كلام كبير
و انهم بيغنوا على نفسهم بالكلام
وبس
كله بيتكلم و كله معترض على كله و كله بيضرب فى بعضه حتى جوا نفس المجموعه
Comment by Dananeer — 2007/03/20 @ 16:31
عرفه اى المشكله ياست “نورا” ؟ ان فى ناس كتير قوى مش فهمه حاجه والناس دى متعرفش حاجه عنكم غير الانتم”…. عالم فضيه ….. عالم ولد كلب عضلتهم عن الشغل وتخصم منهم نص يوم بسببكم …..يعم ده الواحد ف هم بياخد 20جنيه فى الطالعه ده…دول يعم شغالين عند الراجل الاى كان مرشح نفسه فى الانتخابات الاى فاتد وصقت ….”نورا الناس الانتم بدافعه عنه تى هما الاى خربانها والناس ده لو مفهمتش حاجه وفتلو كده هما الاى هيقضو عليكم بدل ميساعدكم… فكرو توصلو لناس ازى وتغيرو فهمهم الغبى وبدل م يقفو يتفركو عليكم وانتم بتدبهتلو ..وبتتحبسو ..ويتهتك عرضكم ..و همالعدين عله القهواه عشان معندهمش شغل يروحه… لانيمن فى بيتهم عشان يقوم الصبح عشان يروح الشغال وهو قرفان ….وعله فكره كان فى كلمه بتقولهلى خالتى “عبله سكسكه” ..الاى متعرفش تضربوه متتخنش معاه لحد متعرف…واعتقد الانتم متعرفش تضربو الناس تى دلوقتى عله الاقل ..فانصيحه من اخوكى الصغير ” حلوه” عرفو الناس انتم بتعملو اى وعايزين اى وفهمهم ..عشان الغبى ضعيف والشعب بتعنها ضعيف…والضعيف مش من حقه يعيش..ربنا يوفقك يا نورا …سيد شباب “سيد مكى”
Comment by ozo — 2007/03/21 @ 0:39
انا خلاص دمي نشف من زمان
انا شايفه ان المعارضه بتتعامل بطريقه خطأ
لان الشعب دا لازم يصحى الاول .. اما احنا ندافع عن حقوق ناس نايمه ف الهم .. مش حيجيب نتيجه
Comment by خجل — 2007/03/21 @ 15:49
هل سبق أن رأى أو قرأ أحدكم نصوص التعديلات الدستورية في أي مكان؟
إذا حصل فأين؟ هل لديك رابط لها على الخط؟
Comment by حَمُكْشَة — 2007/03/22 @ 13:32
التعديلات المقترحة هنا يا حمكشة
http://constitution.sis.gov.eg/ar/html/news178.htm
Comment by Nora — 2007/03/22 @ 16:19
شكرا جزيلا يا نورا.
غلبت في البحث عنها، ولم أجدها إلا على نفس الموقع في نص تقرير اللجنة نفسه بالنسخة الإنجليزية! حتى دلتني صديقة منذ قليل على خبر يسرد بعض المواد وتعديلاته في موقع الهيئة العامة للاستعلامات هذا، بشكل غير دقيق ومع بعض الأخطاء أحيانا. لم أهتد أبدا للنص الأصلي للتقرير، فشكرا جزيلا لك. وفروا ووفرت عليّ، كنت على وشك البدء في ترجمة التعديلات! نشروا اليوم نصها الكامل في الأهرام ويكلي!
هل نشرتها أي مطبوعة عربية؟ لم أجدها على موقع مجلس الشعب ولا الحزب الوطني، ولكني لم أبحث في موقع جريدة القاهرة المهتمة بالوثائق، ولا موقع الرئاسة.
ويعتقد صديق لي، ينوي أن يذهب ويقول لا، أنه ليس من المهم الاطلاع على نصوص التعديلات، المهم جوهرها أو مغزاها وهو ما تنشره الصحف في أخبارها. أرى أن ذلك يخضع للرأي ومن المهم أن يطلع المواطن على التعديلات بحذافيرها ويلاحظ الصياغة إلخ. تعديل المادة 59 يقترح بدلا من “حماية المكاسب الاشتراكية” “حماية البيئة”!
Comment by حَمُكْشَة — 2007/03/22 @ 17:42
واضح إني ما دورتش كويس في موقع الهيئة العامة على النسخة العربي، لأني ما خدتش بالي أساسا إن الموقع عامل نطاق فرعي مخصوص للدستور.
Comment by حَمُكْشَة — 2007/03/22 @ 18:17
يا ستي صلي ع النبي
ثورة ايه وبتاع ايه بس ..؟
(على فكرة كلمة بتاع دي كلمة دستورية رئاسية يعني مش عيب ولا حاجة)
الناس عمرها ما هتتحرك .. عارفة ليه؟
المعارضة أو النخبة اللي على دراية بما يحدث في البلد منعزلة تماما بارادتها عن الشارع وكل تصرفاتها رعناء وخاطئة .. وحمقاء جدا
لا تزدي عن كونها قعقعة ردود فعل بلا أي طحين
الناس موجوعة في لقمة عيشها يا سيدتي الفاضلة ولن تسمع إلا لمن يكلمها عن لقمة العيش دي .. حتى ولو على سبيل البداية
انما النضال من عينة القهر والحرية والقمع وافرجوا عن مصر ..الكلام ده كله مالوش معنى .. اي مظاهرة او احتجاج لا يخرج عن مجموعة من الوجوه المحفوظة يرددوا نفس الشعارات المعروفة بتاعة كل مظاهرة على كام اغنية من بتوع إمام ومتشكرين ..
لا اعترض على ذلك ففيه تنفيس طيب عن الغضب .. لكن تسمحي تقوليلي لو راجل عادي من اللي بيقروا اهرام الجمعة بعد الصلاة ويشتروا البطيخة بعد الظهر ماشي في ميدان التحرير جنب مظاهرة من بتوع كل مرة وسمع الهتافات هيفهم ايه؟؟؟؟
ولا حاجة.
لماذا لم تتفضل المعارضة المصرية بعمل حملة عشان تشرح للناس يعني ايه دستور الاول ويعني ايه تعديلات وازاي التعديلات بتأثر على لقمة العيش وبعدين الكرامة (ده الواقع للاسف .. لقمة العيش تسبق الكرامة في بلدنا)
مش فالحين غير في الجعجعة والصوت العالي والهتافات ثم الاشتباك مع الامن المركزي والاعتقال والولولة على المدونات والانترنت بعد كده
لماذا لم تحشد المعارضة جهودها لطبع منشورات بسيطة توزع في الاتوبيسات والميكروباصات والجامعة والشارع وقدام الجوامع والكنايس يوم الجمعة
ورقة صغيرة تشرح يعني ايه دستور. يعني تعديل. يعني ايه تعديل 34 مادة في طلعة واحدة. وازاي التعديلات هتهبش في لقمة عيشهم؟؟؟؟؟؟
انما النخبة الحلوة مازالت تناضل من البلكونات
والبلكونات عملوها لمعاكسة بنات الجيران مش للنضال يا عزيزتي
Comment by BLUESTONE — 2007/03/23 @ 12:50
بعد انتهاء المولد وبعد الإصابات التي أصابت بعضنا والخسائر التي لحقتنا والإحباطات العميقة التي جرحتنا… أقول إنني متفق مع ما قالته العزيزة بلوستون تماما وأن النضال الحقيقي في هذا البلد هو في النزول إلى الشارع ليس لأج التظاهر والجعجعة – كما اعتدنا أن نفعل – بل أن نغير ونوعي هذا الشارع وأن نرفع مستوى الوعي والفهم لدى هذا الشارع الذي تركته نخبته على هذا القدر من الهطل والغباء وفي النهاة ألقت عليه بالوم أنه جاهل وأحمق وغبي ومستسلم وخانع.. إلخ ف حين أن هذه النخبة خانت هذا الشارع ولم تفه حقه ولم تنزل حقا إليه ولكنها نزلت عليه فسقطت فيه
Comment by الحاج جرجس — 2007/03/29 @ 4:39
آه، لكن فيه سؤال كان قائم دائما: ازاي تشتغل في الشارع مع الناس من غير ما تلاقي نفسك كل يوم و التاني بتتشاكل مع أمن الدولة؟
ما هو العمل المدني ممنوع، و الشغل في الشارع ممنوع. و دالوقت بقى ممنوع أكثر.
المشكلة مش أنك خايف تتشاكل مع أمن الدولة، لكن المشكلةأن دا يرهقك و يشتت جهدك و يبعدك عن هدفك الأصلي، و هو المطلوب منه تحديدا.
Comment by ألف — 2007/03/29 @ 16:39