مصريون ضد مبارك تدعو للتظاهر أمام السفارة المصرية في واشنطن
يان صحفي
مصريون ضد مبارك- واشنطن23/3/2007
تدعو مجموعة “مصريون ضد مبارك” في واشنطن جميع المصريين المغتربين من الطلبة وأصحاب المهن، والجمعيات الأهلية، والسياسية، والمدافعين عن الديموقراطية وحقوق الانسان والمواطنة في الولايات المتحدة الأمريكية للتجمع أمام مبنى السفارة المصرية في واشنطن يوم الاثنين 26 مارس 2007 من الساعة 11 ص – 1 م للتظاهر ضد التعديلات الدستورية التي أقرها نظام مبارك السلطوي، وضد الاستفتاء الذي سوف يُجرى عليها في هذا اليوم في مصر
تبدى المجموعة بالأساس احتجاجها على قيام النظام السلطوي لمبارك بإجراء تعديلات دستورية – الثانية من نوعها في أقل من عامين- بشكل أحادي، قمعي، متعسف. قام النظام السلطوي والقائمين عليه في مجلسي الشعب والشوري في سباق ماراثوني بتعديل 34 مادة من نصوص الدستور المصري دون أدنى استجابة لأي من مطالب أحزاب وحركات المعارضة في تطور لا يهدف سوى لتعزيز قبضة النخبة الحاكمة وتقليص البقية الباقية من هامش الحريات السياسية، فضلاً عن التدشين الرسمي لتبعية مصر الاقتصادية للولايات المتحدة الأمريكية
رفعت المعارضة المصرية، جماعة وأفرادا، في السنوات الأخيرة صوتها عالياً لتعديل الكثير من مواد الدستور لفتح الباب أمام حرية إنشاء الأحزاب السياسية، وتحديد مدد الفترة الرئاسية، وإلغاء قانون الطوارئ، ورفع القبضة الأمنية للدولة عن المواطنين، وإعطاء المزيد من الحقوق السياسية للمرأة والأقباط، وكل الفئات الدينية والعرقية الأخرى، ووقف عمليات الخصخصة الموسومة بشبهات الفساد والاستغلال، وإعادة منح فلاحي مصر حقوق الملكية لأراضيهم المغتصبة، ولكن لم تستجب الدولة لأي من هذه المطالب وسارعت بإجراء تعديلات دستورية مشوهة لا تخدم سوى رموز السلطة وهم قلة فاسدة من القائمين على الحكم سواء من الحرس القديم في الحزب الوطني أو من حكومة رجال الأعمال من أعضاء لجنة السياسات تحت قيادة مبارك الإبن
على سبيل المثال، تم تعديل المادتين 1 و4 لإعلان تحويل النظام الاقتصادي للدولة إلى اقتصاد السوق، وكان برنامج “الإصلاح الاقتصادي” الذي طبقه البنك الدولي وصندوق النقد الدولي في الخمس عشرة سنة الأخيرة في مصر لم يسفر سوى عن صعود فئة قليلة من رجال الأعمال تسيطر على الدولة، وعن تزايد معدلات الفقر والبطالة والهجرة الداخلية والخارجية للعمالة. ومن ناحية أخرى، أضافت التعديلات الدستورية المزيد من قيود نظام مبارك على الحريات السياسية للمواطنين، فهي لم ترفع القيد عن حقوق تشكيل أحزاب سياسية، ولم تستجب لمطالب فئوية ملحة كمطالب المرأة والأقباط، وأطلقت يد الأجهزة الأمنية للدولة لممارسة المزيد من الاعتقال والقمع والتعذيب المنهجي ضد النشطاء السياسيين والمواطنين
والمؤسف أن الولايات المتحدة التي تقدم كل يوم دعاوى دعم الديمقراطية في الشرق الأوسط لم تحرك ساكناً تجاه تلك التعديلات الدستورية نظراً لأنها تستجيب لمصالحها، مما يكشف مجدداً عن زيف تلك الدعاوى وعن عدم رغبة الولايات المتحدة الفعلية في إحداث إصلاح سياسي حقيقي في المنطقة ويؤكد دعهما المستمر لنظم سلطوية قابعة على أنفاس المواطنين في العالم العربي لعقود
اللجنة التنظيمية للمظاهرة- واشنطن 23 /3/2007
* مصريون ضد مبارك هي مجموعة من طلبة الدراسات العليا والمتدربين المصريين في واشنطن من ذوي التوجهات المختلفة، وليس لها علاقة بأية تنظيمات أخرى للمصريين بالخارج
انا عارفة انك مش فى مصر وانك مشغولة جدا ومش فاضية لواحدة زى …بس بجد انا مش عارفة اسال مين ولا اعمل ايه قبل يوم الاتنين ..يعنى تقدرى تقولى كده انى بتصرف بهستريا…
انا مش عارفة اعرف منين مكان الدوائر الانتخابية وكل ما اقنع حد فى الكلية يروح يقول لا يقولى فييييييييييييين؟ انا ساكن فى المكان الفلانى وانا مش عارفة ارد عليهم ومش عارفة اسال مين حتى عن دائرتى انا ؟
ولازم بطاقة انتخابية ولا تكفى الشخصية؟؟
لو تعرفى تفيدنى ياريت تردى عليه بسرعة اسال مين ؟؟اروح فين؟؟ ادخل على ايه على النت؟؟ عشان بس الحق اقول للناس دى كلها
انا بجد اسفة جداجدا يا نورا ,عارفة انه مش وقتى خالص بس انت اللى جيتى على بالى وميرسى ليك يا ستى وترجعى بالف سلامة
Comment by واحدة — 2007/03/24 @ 19:19
الطريقة اللي أنا أعرفها هي أنك تروحي قسم الشرطة اللي بطاقتك الشخصية أو الانتخابية تابعة له.. وهناك المفترض جدلا أنهم بيكونوا عارفين المقرات الانتخابية فين وعندهم نسخة من قوائم المقيدين في كل مقر انتخابي.. طبعا حاولي تمثلي انك من الحزب الوطني عشان ميزحلقوكيش.. يعني مفيش داعي تلبسي برتقالي أو أحمر أو أصفر أو أسود عشان متتحسبيش ع الغد أو الاشتراكيين أو كفاية أو الاخوان..
واحكيلنا ايه اللي حصل.. بجد برافو عليكي.. ياريت الناس تكون ايجابية كدة.. أنا بردو هأحاول أصوت في السفارة رغم أنهم هيرفضوا.. بس نحاول برضه..
Comment by Nora — 2007/03/24 @ 21:09
صدقيني مش هيكون ليها طعم ، ازاي تحضري مظاهرة من غير عربيات الامن المركزي والاف العساكروالضباط وفرق الكاراتيه والحواجز
الحاجه الوحيدة اللي هتلاقيها امن الدولة
بس ايه الحلاوة ده ، نورا في شبرا هيه نورا في ميدان التحرير ، هيه نورا في امريكا
الف تحية من القارة السمراء وشدي حيلك وخلي بالك من نفسك
Comment by nael — 2007/03/24 @ 22:53
لأ أنا مستنية بس لما أفوق من مبارك والتعديلات الدستورية عشان أحكيلكم على اجراءات تنظيم مظاهرة في أمريكا.. حاجة مسخرة..
مثلا امبارح باقول للزملاء في التنظيم ياللا بقى نروح نعاين موقع السفارة عشان نعرف مداخل ومخارج المنطقة.. طبعا ضحكوا عليا للصبح.. صعب بردو الواحد ينتقل من الدولة البوليسية للحرية مرة واحدة.. الدجمة الأمنية لسة مسيطرة عليا وحياتك وحاسة ان فرق الكاراتيه هتطلعلي هنا لابسين بلو جينز وجايين في عربيات شيفروليه
Comment by Nora — 2007/03/24 @ 23:02
ميرسى يانورا جدا جدا على ردك بجد افدتينى ومتوقعش انك تردى بس مش خزلتينى
ميرسى ليك اوى يا جميلة وربنا معاك فى المظاهرة وتعرفى تصوتى وبكرة اول يوم ليه فى اى دائرة انتخابية حدث قومى بلنسبة لى ولناس كتير
هنحكيلكم بكرة
وميرسى ليكى تانى
Comment by نهى — 2007/03/25 @ 14:01
ها يا ستشي
عملتوا ايه في بلاد الفرنجة؟
احنا العيال اتفشخوا 360 درجة عندنا
الا قولي لي يا اختشي
هو ايه مزاج الامن في انه يقلع البنات وياخد هدومهم؟
يمكن مش معاهم فلوس يشتروا هدوم لمراتاتهم؟
والله باهزر من غلبي
النهاردة كانت مذبحة
طبعا انا ما رحتش
وكنت قايلة اني مش ح اروح
بس انا بعد كده بقى ح ابقى البس طرطور بنجوم واهلة واقرا الطالع
عشان انا كان قلبي حاسس ان المعارصة عاملة صفقة مع الحكومة وح تبيع العيال
واللي حسبته لقيته
بعد كده لما تحبي اشوف لك البخت تعالي لي
Comment by نوارة نجم — 2007/03/26 @ 6:49
مظاهرتنا فاضل عليها حداشر ساعة يا نوارة.. مش عايزة حاجة من السفير بتاعنا أجيبهالك معايا بالمرة أو أوصلهاله؟
Comment by Nora — 2007/03/26 @ 7:19
عارفين يعنى ايه مهزلة|…. مسخرة؟… لالا هى كلمة انا لسه مش عارفة اوصلها من حالة الذهول اللى عندى …
انا لسه راجعة من الاستفتاء وكنت قلت هاحكيلكم اللى حصل … اسمعوا بقى:
المكان: مدرسة القصر العينى الابتدائية المشتركة – فى المنيل-
الزمان : 3:30 ظهرا
الحدث: مهزلة ….كنا اربع بنات كلنا بندرس فى كليات وشكلنا باين عليه… وصلنا المدرسة لاقينا 5 او 6 عسكر واقفين عند باب المدرسة من برده شكلهم قلقنا شوية لاننا مش متعودين واول مرة بس عادى دخلنا … المكان فاضى بطريقة غريبة .. لاقينا ظابط كده شكاه ملازم ولا حاجة بيسمع اغانى من راديو سالته التصويت فين قالى: جوه
دخلنا لاقينا ناس قاعدة شكلهم كده موظفين حكومة سالت واحد التصويت فين ؟… قالى: معاكم بطايق انتخابية قلت لا بس معانا بطايق شخصية قال لى : لا ماينفعش …. قلت له : بس احنا سالنا ناس فى الحزب الوطنى وقالو لنا ينفع بالبطاقة الشخصية فقط…{ اى كلام اصل نورا ربنا يكرمها لما سالتها فوق هنا قالت لى حاولى تمثلى انك من الحزب الوطنى عشان ميزحلقوكيش} كانت قاعدة جنبه واحدة – شكلها برده موظفة- قالت : لالا ينفع ينفع .. بس تروحوا لجنة الوافدين اخر الطرقة شمال..
دخلنا المكان كله مش فيه حد بيصوت غيرنا والباقى موظفين.. ولا قاضى ولا اى حاجى
المهم دخلنا اللحنة – لا لجنة ولا حاجة حجرة ضيقة الاضاءة فيها ضعيفة- لاقينا تلاتة موظفين بيشربوا الشاى قلنا عايزين نصوت واحنا وافدين واحد قال معاكم بطايق انتخابية؟ حكينا نفس السيناريو اللى اتقال بره اجاب احدهم وكان معاه الملف: ماشى ماشى ..فين بطايقكم ؟ وهو بياخدها منا سالت واحد منهم كان واقف جانبى: هو مش فى قاضى هنا ولا ايه ؟ بصلى باستغراب وشك وقال لى: انت متخرجة ولا بتدرسى ؟ قلت: بدرس فى كلية الهندسة ليه؟ قال لى : عادى بسال … وخرج يكمل السيجرة بره من غير ما يرد عليه… الموظف سجا الاسماء فى كشف الوافدين و اصحابى اجدوا ورق الاستفتاء وانا واقفة فى مكانى ساكية- كنت عارفة انى مش هصوت عشان بطاقتى الشخصية ضاعت ولسه مش طلعت واحدة- سالنى بطاقتك ؟ قلت : انا مش هصوت اصلى مش معايا بطاقة؟ قال لى : لالا مافيش مشكلة مافيش مشكلة اسمك ايه ؟ والله ما بكدب كتب اسمى فى الكشف والقسم اللى انا تابعة له من غير لا بطاقة وحتى كارنيه كليه؟ – يمكن عشان كان فاهم انى حزب وطنى ولا عشان لسه طالبة مش عارفة المهم-
وسط ذهولى اجدت ورقة الاستفتاء وكتبت بغل وحرقة دم {غير موافق} اه .. نسيت لما اجدت الورقة الشخص اللى سالته على القاض
Comment by نهى — 2007/03/26 @ 19:35
لما اخدت ورقة الاستفتاء الشخص اللى سالته على القاضى كان دخل قال لى انت هتكتبى ايه؟ قلت : غير موافق رد بقلق: يانهار اسوخ… رد اللى كان ماسك الكشف : لالا مالكيش دعوة بيه اكتبى اللى انت عايزاه … مالكيش دعوة بيها ياعم سيبها تكتب اللى هى عايزاه .. قال له : ماشى ماشى … وسكت
خلصنا ودخلنا الورق بايدينا فى الصندوق وعملنا الفسفور واحنا خارجين سالونا كتبتوا ايه قلنا غير موافق قلقوا لحظة- تقريبا عشان كانوا فكرينا حزب وطنى- وبعدين قاعدوا يهزروا وخرجنا من المكان
والللللللللللللله يا جماعة لاقاضى ولا ظباط ولا عساكرغير عند الباب …. والادهى ولا ناس اصلا بتصوت الراجل وهو بيكتب اسمى فى الكشف كان حوالى عشرين اسم
انا محروق دمى طب على ايه بقى كل التمثلية دى … انا مش ندمانة ابدا انى رحت وانى قلت لناس تروح ده كان لازم يحصل … انا بس محبطة
كنت عارفة ان مافيش ناس كتير هتصوت بس مش للدرجة دى كان عندى امل اشوف قاضى….. معارضة…. اى حاجة
انا اسف طولت عليكم بس ده اللى حصل معايا لو حد كان يومه افضل ياريت يقول
Comment by نهى — 2007/03/26 @ 19:46
[…] For more information, check Nora Younis’ blog. […]
Pingback by Protest Egypt’s Constitutional Amendments in DC, Monday : my occupied territory — 2007/04/10 @ 1:35