منعم هيفضل اخوان
ويا ريت كل الاخوان زي منعم
التقيته للمرة الأولى في يونيو 2005 حيث قمت بترجمة لقاء أجرته معه قناة بي بي اس. رأيته بعدها مرات عدة في مظاهرات ومؤتمرات متعددة الهوية وان جمعتها معارضة النظام، ولكن لم نتبادل حديثا قط. بدون اتفاق مسبق لعب الموبايل الدور الأكبر في بناء الثقة بيننا. لم يكن منعم قد بدأ التدوين بعد. أبعث اليه رسائل قصيرة عبر الموبايل عن آخر الاعتقالات ومؤتمرات كفاية، فيقوم بنشرها دون أن أطلب منه. وبالعكس، يوافيني برسائل قصيرة عن أخبار اعتقالات الاخوان فأعيد ارسالها الى هواتف النشطاء والاعلاميين والحقوقيين دون أن أقول له شيئا. وبالطبع لا أسلم من الانتقاد – لماذا تروجين للاخوان من هاتفك المحمول؟ هل جننتِ؟
ظلت علاقتنا هكذا عملية، مخلصة، غير مباشرة.. ولكن مع الوقت، والانتخابات الرئاسية ثم البرلمانية، وصدامنا – كل في طريقه – مع قوات وأجهزة أمن النظام، نما لدي احساس أن منعم هو “جيلي“.. يمثل مصر قدر ما أمثلها.. وأن له في قلبي مكان خالد عبد الحميد أو شرقاوي رغم أني لا أعرفه عن قرب.. وحين تم اعتقاله في مارس 2006 وجدتني أبكي.. ظللت على اتصال بزميلته ايمان عبد المنعم التي وافتني أخباره أثناء الاعتقال.. من أصعب المواقف التي مرت بي حينها اجراء مقابلة صحفية حول جماعة الاخوان مع لواء أمن الدولة السابق فؤاد علام في بيته بالمهندسين.. من الصعب جدا أن تلتزم الموضوعية – وليس الحياد – وتخفي مشاعرك أمام اللواء فؤاد علام وهو يتحدث عن التنظيم الارهابي السري للاخوان وخطرهم على أمن المواطنين بينما عبد المنعم محمود، الواد الاسكندراني المصري الجدع أبو مخ نضيف، في السجن
ذات مساء بينما أقود سيارتي في ميدان التحرير دق هاتفي برقم مجهول.. عادة لا أرد في مثل هذه الظروف ولكنه ما حدث.. جائني صوته قويا مبتهجا “أنا خرجت من السجن النهاردة ومن هنا ورايح دي هتبقى نمرتي، سجليها عندك.. هأسافر اسكندرية دلوقتي أطمن أهلي وأطمن عليهم وأرجع مصر (القاهرة) بعد بكرة”.. صرخت من الفرحة وبعدما قفلت السكة بكيت.. شاب أطلق سراحه منذ ساعات قليلة سيرى أهله مدة 48 ساعة فقط ويعود لدوره في التنظيم.. مش محتاج وقت.. مش محتاج يفكر.. مش محتاج يراجع نفسه.. وفي نفس الوقت مش دجمة، مش مغيب، مش جزء من القطيع.. صوته فرحان، مطمئن، وبخير.. تمنيت نفس الثبات والهدوء والوضوح للشباب الليبرالي والقومي واليساري والفرط
أنا أخوان
بدأ منعم التدوين في اكتوبر 2006.. عنوان مدونته جاء صادما، عنيدا، معترفا بتهمته الأزليه فخورا بها.. ذكرني بمشهد اعتقال نبيلة عبيد في فيلم الراقصة والسياسي حين قررت الراقصة نشر مذكراتها لفضح الفساد السياسي في مصر فلفقت لها أجهزة الأمن تهمة ارتداء بدلة رقص فاضحة.. لحظة القبض عليها قال لها الضابط “مش تخشي الكباريه تغيري هدومك يا مدام؟” ردت “لأ يا باشا أنا أحب أفضل لابسة التهمة بتاعتي” ن
في “أنا اخوان” أثبت منعم أن الاخوان ليسوا مجرد أرقاما تكتب وتردد بجوار كلمة “معتقل”.. رأينا من خلاله جيلا من الاخوان، اختلفنا معهم أو اتفقنا ولكننا رأيناهم لأول مرة كأفراد.. يتحدثون عن مشاكلهم ورؤيتهم ويختلفون مع بعضهم وينتقدون مسئوليهم وقياداتهم كما ننتقد نحن بيانات كفاية أحيانا ونختلف مع قياداتها.. وبدأ الاخوان في التدوين، والتعليق، والرد.. ولعل من أفضل ما كُتب هنا مقال مارك لينش الذي نشر في الجارديان تحت عنوان اخوان التدوين
أنا حر.. أنا انسان
في مارس 2007 وقت صدور الحكم بأربع سنوات سجن للمدون كريم عامر كلفت باستنفار موقف من الاخوان.. أرسلت لمنعم وفوجئت برده “أنا نشرت يا ستي من خمس دقايق شوفي البلوج بتاعي وبلاش نظام محاكم التفتيش ده :-)”.. كتب منعم في مدونته الحرية للاخوان.. الحرية لعبد الكريم.. الحرية لمصر.. وبالطبع لم يسلم منعم من النقد فكيف يتضامن الناشط الاخواني مع كريم عامر الذي انتقد الأزهر وأهان المسلمين؟ كيف يطالب بالحرية والآدمية لمن يختلف معه عقائديا وفكريا؟ كيف يخرج أحد شباب الاخوان عن القطيع؟
أنا محاصر
فجر الجمعة 13 ابريل وصلتني رسالته “قد يكون هذا آخر ما أستطيع مراسلتكم به خبر كتبته مدونه انسى عن مداهمة منزل والدي ومن المنتظر أن أقدم نفسي للنيابة”.. في مراسلات أخرى خاطفة قال لي أنه قلق جدا على صحة والده فهو مريض جدا، وشقيقه الأوحد خارج البلاد، وأنه حانق على نظام مبارك الذي بعث بكتيبة قوات خاصة لترويع رجل وامرأة مسنان من أجل القبض على الارهابي عبد المنعم محمود.. قال منعم أنه يفكر في تسليم نفسه ومنتظر رأي المحامين.. بعدها قرر اختبار أمر القبض عليه وبالفعل تم انزاله من طائرة كان يستقلها لرحلة عمل ويلفت أحمد غربية نظرنا أنه بدلا من تحويله لنيابة مصر الجديدة القريبة من مطار القاهرة تم تحويله لنيابة شبرا (؟) اليوم تدهورت حالة والد عبد المنعم الصحية وتم نقله الى العناية المركزة وهناك قلق على حياته
هزل
منعم مثل أمام نيابة شبرا التي قررت حبسه خمسة عشر يوما واتهمته بحفنة تهم هزلية منها التشهير بالنظام المصري واثارة الشكوك حول عمليات تعذيب منهجية بأقسام الشرطة والسجون.. يبدو المنطق، ان وجد، وراء المشهد كله هزليا.. فمنعم، وان عذبوه كما عذبوه من قبل (فيديو)، سوف يخرج في نهاية المطاف.. وسيظل مدونا.. وسيظل اخوان
ويا ريت كل الاخوان زي منعم.. ولكن هذا بالضبط ما لا يريده النظام
حملات الاقصاء المبكر للكوادر المستنيرة من التيارات المختلفة، أو انهاكها، تتم منهجيا من أجل الحفاظ على ثبات الحالة في مصر وحجم الفراغ على الساحة السياسية.. من المهم جدا للنظام أن تستمر فزاعة الاخوان بخطاباتهم الظلامية وقطعانهم العمياء، وبذلك يستمر تخبط المعارضة وتحللها ويبقى جمال مبارك في صورة البديل
مفارقة
يستمر منعم في اثارة جدلا واسعا حتى وهو في محبسه.. شباب الاخوان من المدونين ينظمون وقفة تضامنية بلوحات المفاتيح (كي بورد) بنقابة الصحفيين ويدل مستوى التنظيم والدعاية أنها مبادرة فردية خارج اطار الجماعة، ومع ذلك استطاعوا نشر الدعوة على موقع الاخوان.. فكرة الكي بورد تنبئنا بقدرتهم على الابداع والتطوير.. حتى الفتيات أخذن المخاطرة وخرجن بدون اذن (للمرة الأولى) من أجل التضامن مع زميلهن منعم
ويأتي بيان مركز النديم لحقوق الانسان وبعض المراكز المصرية الأخرى حول اعتقال عبد المنعم دليلا على الاتساق مع الذات والمباديء والأهداف التي أنشأت تلك المراكز من أجلها.. في ذات الوقت يضع منعم دعاة الحرية والديموقراطية في الادارة الامريكية في مأزق.. فالذين تضامنوا أو أصدروا بيانات أو نادوا بحرية علاء، ثم شرقاوي، ثم كريم عامر، ربما يرغبون في صم آذانهم عن اعتقال مدون اخواني.. ولكن منعم ليس أي اخواني.. انسانيته، فرديته، واعلاؤه لقيم الحرية والديموقراطية تجعل مهمتهم أصعب وتستدعي منا جميعا وقفة
مكان منعم في بيته، أمام شاشة الكمبيوتر، بجوار والده المسن المريض.. أما السجن فله آخرون
بداية حضرتك أحب اعلق على كذا نقطة
بالنسبة لموضوع عبد الكريم مثلاً
مش عارف حضرتك عارفة الموضوع ده و لا
اللى بيفهم من الإخوان (عادى أنه يكون فى ناس مبتفهمش) سواء من القيادات أو القواعد
لا يرضى بسجن عبد الكريم
لكن فى إشكالية واحدة بس
يعنى مثلاً إستحالة الإخوان يطلعوا بيان رسمى يطالب بالحرية لعبد الكريم (مع أنهم معملهوش مع منعم)
لسبب بسيط أن أنا لا يمكن أناصر وأطالب بالحرية لواحد بيشتم دينى
لأن ده مخالف حتى لدينى فى الولاء والبراء لمن عادى الله ورسوله
يعنى أنا أستطيع أن أعلن أننى لا أرضى بسجن كريم لأن هذا ليس عقاباً أصلاً علاوة على كونه ظلما ولا يمت لعدل الإسلام بصلة .
لكننى لن ولم أنخرط فى حملة للمطالبة أو للعمل على مناصرته أو مناصرة فكره أو حرية فكره حتى
يعنى مثلاً مش هاحط له بانر وأعلن تضامنى الكامل معاه .
(ده رأيى الشخصى مش عارف حاسس أنى مش عارف أوضحه)
وده مش خروج عن قطيع الإخوان كما أسميتيه لأنى أظن أن هذا رأى الجماعة (ومحدش لحد دلوقتى على فكرة سأل حد من قيادات الجماعة فى هذا الموضوع)
المفارقة
تصحيح فقط لا أظن أن الفتيات المشاركات خرجن بدون أذن
لأن ببساطة زى ما بيتقال هما مش صيع
يعنى على الأقل أكيد قالوا للأم أو للأب أو لحد فى الإخوان هما خارجين فين 🙂
Comment by محمود سعيد — 2007/04/18 @ 20:26
طب يا بختك انك عرفتيه من قرب كده
انا مسمعتش عنه الا بعد الاحداث دى
بس الحمد لله الاخوان مليانيين رجالة زى منعم بس مدفونين للاسف
ربنا معانا جميعا
Comment by امام الجيل — 2007/04/18 @ 20:26
أنا فخور بيكي يا نورا يا بنت مصريةو أنسانة بجد .فخور بيكي انت و منعم يا ريت كل الشباب زيكم و ياريت كل الأخوان زي منعم الكبير (د/عبد المنعم أبو الفتوح)و منعم الصغير اللي قلوبنا معاه.
Comment by mohammad khamis — 2007/04/19 @ 2:27
معلش حغلس و ادخل تاني تعليق على الأخ محمود : طبيعي انك تتعاطف مع واحد له نفس اتجاهك الفكري دة مش موقف ولا مبدأ .الموقف بجد هو التضامن مع من يختلف معك فكريا مش مطلوب توافق على آراء كريم اللي انا مستنيه يطلع و نتكلم ونتناقش معاه كلنا بحب و ود وعلى أساس التكافؤ مش على أساس النصح و الفوقية . المطلوب يا محمود اننا نتضامن مع حق كريم و منعم و الجميع في التعبير عن آرائهم دة لصالحنا صدقني . بالصدفة احنا كمسلمين أغلبية عددية في مصر كان ممكن نكون أقلية تخيل وقتها الألم اللي حنحسه لو معبرناش عن رأينا و معتقداتنا . التضامن مع الحق في التعبير مختلف تماما عن الموافقة على مضمون الرأي .شكرا يا محمود وآسف لدخولي مرتين
Comment by mohammad khamis — 2007/04/19 @ 2:37
يا أخوان احنا تعبنا قوى .. والله العظيم تعبنا .. انتم حيرتونا معاكم .. أعدادكم مهولة وسط الشارع المصرى .. مواقعكم مؤثرة .. ليه الخنوع بتاعكم دا؟ .. قياداتكم فى السجن وانتم ساكتين .. احنا كمان عندنا مشاكلنا اللى بنسعى لحلها ضد نظام مبارك ومراته وعياله الاتنين .. وانتم عندكم مشاكلكم .. اعملوا حاجة تثبت لينا انكم بتسعوا لحل مشاكلكم .. اتصرفوا .. ماتخلوناش نفتكركم بتعملوا تمثيلية مع نظام مبارك ومراته وعياله .. بس برضه قلوبنا مازالت معكم مادمتم اصحاب قضية .. كلنا فى الهم سوا .
Comment by أأبو عمر — 2007/04/19 @ 17:52
انورا يا يونس
هذه ربما هى أرق مدونة قرأتها لكى ضمن مدوناتك الجميلة
أنا بالفعل مندهش من قدرتك على الإمساك بهذا الخط الرفيع الجامع لهذه القيمة المسماه الزود عن الحرية فى ترجمتها الحركية وأعنى بها التضامن بين المختلفين وراء هدف واحد هو حرية المعتقلين
عبد الكريم والكثيرين من الأجيال الجديدة للأخوان وضعونا فى حيرة ومقارنة إجبارية بين جيل أكبر يؤمن بالانصياع التام للتابعين وجعل المناقشات فى أضيق إطار والاكتفاء بالسمع والطاعة كرباط فكرى يضم الحركيين جميعهم وبين جيل جديد يشعر بقيمته كفرد رغم انتماؤه للجماعة جيل خلق موازنة ويحاول أن يعبر عن أفكاره التى تخرج به أحيانا عن إجماعها فى مشهد جديد على هذه الجماعة
اهتمامنا بالإخوان مصدره أنهم قد صارو أكير القوى وأكثرها تأثيرا على النظام الحاكم لهذا نسمع أصوات تستاء من مراوغاتهم وانسحابهم وامساكهم التاريخى للعصا من منتصفها، ربما جيل منعم يكون جيلهم الثورى القادر على التضحية لآخرها وليس لمنتصفها، كما يفعل الجيل القديم الذى يفعل الشئ ثم يتلقى الضربة فيعلن الصمود السلبى لتجرى داخل القنوات الخفية الترضية المناسبة فيعود التنظيم لنقطة الصفر
جيل عبد المنعم مثل جيل الشباب الاشتراكى الحالى الذى رأى فى التجمع والناصرى سقف منخفض جدا ومراوغة سياسية ونفاق سياسى رخيص لا يليق بالاشتراكيين فلم يعلق عليهم أى أمال وانطلق لساحات جديدة ككفاية ومراكز حقوق الانسان التى لازال عليها بعض علامات الاستفهام والاحزاب الجديدة كالكرامة وتنظيمات الثوريين وغيرها
اعتقد أنه جيل طازج تحرر من دوجما الايديولوجيا ومبادئ السمع والطاعة ويبحث عن مشروعه التحررى الذاتى ولديه أدواته المستحدثه كالتدوين والاعلام الشعبى والتنظيمات العلنية والتظاهر المرح وغيرها متجاوزا خلافات مدمنى الانشقاق القدامى متفق مع اختلافات قطاعاته السياسية على ما يمكن تسميته قيم الحد الأدنى التى تشكل وفقها آجندة عمل تضامنى سياسى يقف على رأسها بند تحرير المعتقلين ويند اصلاح دستورى وبند رفض التوريث وبند فضح الفساد وبند العودة للجماهير
هذا الجيل أظنه صال لأ يكون محلا للرهان على قدرته على احداث تغيير طال أمد انتظاره والثقة فيه كونه مختلف وعنيد حقاً
Comment by فخامة الحاج ابو جمال سخصيا — 2007/04/20 @ 9:41
فى تعليقى السابق قصدت عبد المنعم
عفوا
وهذا لا يعنى أننى لا أتضامن مع عبد الكريم واتعاطف مع قضيته التى تعكس مقدار الغباء والتسقط وغياب العقل الذى عيشه وإن كنت أراه مخطئاً لكن الخطأ الذى ارتكبه لا يستأهل الحبس والقمع بل يحتاج للمناقشة والمحاجة والحنو على عقله الغض، الحكم على عبد الكريم هو دفع له لكى يستكمل مسيرته كشهيد مدعى وسيستمر فى طريقه مدفوعا بمرارة الظلم واحساس بقسوة هذا المجتمع
Comment by فخامة الحاج ابو جمال سخصيا — 2007/04/20 @ 9:45
انت بنت المرحوم اسماعيل يونس؟
اول مرة اعرف
Comment by نوارة نجم — 2007/04/20 @ 19:28
أيوة يا نوارة الدنيا صغير قوي.. وعندي في البيت صورة أبويا مع والدتك صافيناز كاظم في تحقيق صحفي شهير عملوه سوا عن تجار المخدرات من أرشيف تحقيقات أخبار اليوم.. كتير باستغرب أنا ازاي لسة ماقابلتكيش لغاية دالوقت؟
Comment by Nora — 2007/04/20 @ 19:53
والله معاكي حق في كلامك
بس احب افهمك
فكر منعم ما هو الا نموذج لفكر شباب الاخوان
زوري مدونتهم
اتكلمي معاهم
شوفيهم علي قهاوي وسط البلد
شوفيهم لما خرجوا عشان منعم وقالوا طز في الاذونات والكلام الي لا بيودي ولا بيجيب
هما دول شباب الاخهوان الي البنا بعتهم فلسطين
وسعيد اني عرفت مدونتك
Comment by أحمد عبد الفتاح — 2007/04/22 @ 1:37
وقع بيان المدونين للتضامن مع عبدالمنعم محمود
شارك بتوقيعك
أنشر البيان في كل مدونة تعرفها
ساهم في حرية المدونين .. وحرية منعم
http://free4monem.blogspot.com/
Comment by عبدالرحمن عياش — 2007/04/22 @ 7:50
لاسف اصبحت حكومتنا اسوء حكومات العالم واظنها فى مرحلة احتضارها لذل تأخذ كل من يعارضها لكن اذا ظنت الحكومة انها اذا قبضت على عبد المنعم وغيره من المدونين ومسجونين الرأى ان مصر ستنتهى لا فهناك فى كل منزل من هو اسن منا جميعا وك يوم يود طفل يكره حكومة تطفلت عينا قتلت حريتنا ككرهه لاسرائيل
لذك يجب جميعا ان نعلن تضامنا مع عبد المنعم مواطنين ومدونين حتى لا تقتل فينا حكومتنا احلامنا البسيطة فى الحرية
كريم ابحيرى
http://www.egyworkers.blogspot.com
مدونة عمال مصر
http://www.egyworkers2.blogspot.com,
مدونة عمال غزل المحلة
Comment by kareem elbehirey — 2007/04/23 @ 23:26
we all r praying for Monem and anyother 1 who was taken without any reasonable charges…..
good be with him and with egypt !!!
Comment by Mariam — 2007/04/24 @ 3:06
God * be with him and with Egypt *
Comment by Mariam — 2007/04/24 @ 3:07
تحياتى اليك يا نورا على مدونتك اولا
وعلى البوست ده بالخصوص لانه مكتوب حلو جدا
وصادق جدا
Comment by محمد الهنداوى — 2007/04/24 @ 20:57
Thank you Nora for this heartfelt post that gives us a better idea of who Abdelmonem is and what a great activist he was and will always be. Praying for his release.
Comment by moii — 2007/04/25 @ 20:21
Ya Nora,
Assalamo Alaikom
ezayek, w feenek keda men wa2t lama saferty ekhtafeity
7elwa awy el article, we hope we had several people like Moneim
we need all the efforts to release him, and release other political prisoners in Egypt.
best
Ibrahim El Houdaiby
http://ihoudaiby.blogspot.com
Comment by Ibrahim El Houdaiby — 2007/04/26 @ 17:44
البلوج منور يا ابراهيم.. شد حيلك في عمك، انت على بالي كتير ومتابعة أخبارك وبأبعتلك السلام
أنا مش مختفية ولا حاجة، باتحرك على قد ماقدر في واشنطن، وأخبار مصر تسد النفس زي مانت عارف.. البوست اللي جاي هيبقى بعد مظاهرة الجمعة الجاية أمام السفارة المصرية في واشنطن..
خلاص هانت، كلها كام أسبوع وارجع مصر وأول لما أوصل هاكلمك.. سلامات وخلي بالك من نفسك – نورا
Comment by Nora — 2007/04/26 @ 20:30
مرحبا نورا ….
سمعت كتييييييييييير عن عبد المنعم بس اول مرة حس اني بحبو
كلامك رائع ورقيق وبيوصل للقلب بسرعة
اي تعليق لن يكون له اي مفعول مع زمن نعيشه امواتا
للاسف نرى بام اعيننا قتل الاخيار ونسكت بل لا يرف لنا جفن
كما قلت سابقا نستحق ما يجري
تقول قول رجل يا منعم في زمن قل فيه الرجال
يــــــــــا رب تطلع بسرعة وبخير
شكرا يا نـــورا
Comment by dania — 2007/04/26 @ 23:08
أنا مش في مصر أنا كمان، بس راجع قريب إن شاء الله
بتبعتي سلامات مع مين؟ مفيش حاجة وصلت
وتليفونك مش شغال
مستنيين أحلى شغل في المظاهرة،
تيجي بالسلامة إن شاء الله
سلامات
إبراهيم الهضيبي
Comment by Ibrahim El Houdaiby — 2007/04/26 @ 23:44
انا احييكى على ه>ة الوقفه مع منعم والكلام الطيب الى كل صحاب منعم عارفينو بس ليه نقد فى كلمه اتمنى اوضحها الاخوان مافيش حد فيهم قطيع بيمشى ورا قياداته من غير تفكير لو اصلناها قرانيا فى منهج الاسلام قل ه>ه سبيلى ادعو الى اله عل بصيرة انا ومناتبعن يعنى على بصيره احنا جيل اتولد مش مرتاح يعنى من اول ماالواحد فينا يقول انا اخوان امن الدوله بيستدعى وبيتاخد مره واتنين وتلاته واربعه فبالتالى الشخصيه الى تتربى فى جو زى ده بتبقى لااظن انها جزء من القطيع وممكن نختلف مع القيادات ونتنا قش ونغير مافيش مشكله ارجو تكونى فهمتينى كويس حاتم
Comment by االا خت نورا — 2007/04/28 @ 2:57
اسجل لك تقديرى ليس لانى من الاخوان ولكن لاننى احسست انك انسان
Comment by ااحمد رامى — 2007/05/01 @ 16:09
احيك ليس لانى اخوان لكن لانك انسان وربنا يجمع اولاد مصر على كل خير
Comment by ااحمد رامى — 2007/05/01 @ 16:19
انا مش اخوان انا مصرى عايش حالة غليان انا شايف المصرى بينهان مش تقدم لكن اقل من كتير من البلاد لحد امتى نفضل فى سكوت لحد ما انا وانتا كمان نتهان اللى بيحصل ده نتيجة لمرض عمرة 26 سنة الناس بينداس عليها باسم مين اللى بيحصل لعبد المنعم باسم الشعب باسم الديمقراطية زى ما طلب التابعى انة يتكتب على قبرة طظ .
Comment by ابوابو كمال — 2007/05/27 @ 2:58
اانا نفسي اعمل مدونة زيكم ياشباب البعثوالي الخطوات من فضلكم علي اميلي
Comment by ااسماعيل فهيم — 2007/06/15 @ 12:34
في البداية انا بحب منعم جدا وبحترمه علي الرغم اني قابلته مرة واحدة بس ومع ذلك بختلف معاه في بعض التدوينات اللي بيكتبها وزي ماهو قال دي ظاهرة صحية داخل الاخوان انا بس عايز اكتب حاجة عن عبد الكريم سليمان انا ممكن اتعاطف مع واحد يساري او علماني بس ميكنش واقف موقف العداء من ديني ونقضه يصل الي حد السباب دا مش صاحب فكر الانسان يحترمه او يتناقش معاه فيه وبالتالي لنا يترمي في السجن ممكن اعترض علي السجن مش علي العقوبة بوجه عام ياستي في البلاد اللي بتسمي نفسها حماة الديمقراطية وسدنتها لا يسمحون بذكر الهلوكست بالتشكيك فضلا عن الانكار دا انسان اهان الاسلام ونبيه الكريم واحد بيقول لينا ان كل متدين متخلف مستنيه من المتدين انه يعمل له ايه وبعدها كمان مش عايز واحد يقول لو دافعت عن فكره هتكون افضل منه او هتثبت انك مع حرية الرأي هقوله ببساطة لو كان هوا له فكر اصلا مش كل واحد اهان الدين يبقي صاحب فكر
Comment by سلام سالم — 2007/10/18 @ 14:44