خالد عبد الحميد، عمره 31 سنة، ساكن في أول كورنيش المعادي، يا دوب 20 دقيقة من ميدان التحرير.. كل يوم جمعة بيروح لأمه المناشي -قرية جنب القناطر- عشان بتطبخله ملوخية.. دخل السياسة من أيام الجامعة وطول شوية في الجامعة عشان السياسة بردو.. أيام العز في الجامعة كانت وقت الانتفاضة ومظاهرات الطلبة.. يمكن حكى لي أنه ابتدا ناصري.. مش متأكدة.. لكن أكيد فاكرة أنه شارك في معسكرات الشباب القومي العربي زمان.. خالد كان ليه دور كبير في حركة شباب من أجل التغيير ولجنتها التنسيقية أيام مجدها.. واد اشتراكي جميل وجدع.. بيعرف يهدي النفوس لما الدنيا تولع في اجتماعات شباب ويهدي الجو بين الغد والكرامة والعمل.. يعتمد عليه.. أول مرة قابلته وقت ما كنا بنحضر لمؤتمر الشارع لنا (بعد أحداث التحرش بالسيدات في استفتاء مايو 2005).. خالد ساعد في طباعة وتوزيع الدعوة وحجز القاعة والذي منه.. متكلمناش كتير بس عرفت انه لما يقول حاجة يبقى هيعملها.. اتقابلنا بعد كدة في مظاهراات كتييير وفي وسط البلد.. خالد مدمن شيشة ودايما قاعد ع القهوة.. خصوصا قهوة أفتر آيت اللي جنب دار نشر ميريت.. واجب سنوي مقدس عند خالد هو مساعدة محمد هاشم صاحب دار ميريت في معرض الكتاب كل سنة.. يسيب اللي وراه واللي قدامه واللي جنبه ويروح يقف مع هاشم في المعرض.. في الفترة الأخيرة خالد ساب شغل الشارع شوية وركز في المشروع اللي كان طول عمره بيحلم بيه –  “الدفترخانة“.. موقع للتوثيق الاعلامي والصحفي.. من أيام ما خالد كان باحث ميداني في مركز حقوق السكن ويمكن قبلها كمان كان بيطلع عين أمه عشان يدور على معلومة في أرشيف.. الدفترخانة دلوقتي أرشيف حي ومصنف على الانترنت وفي المرحلة القادمة كمان هيكون ديجيتال.. الواد خالد يبقى مدير وشريك في هذا المشروع الفخم بعد ما كان مبيعرفش يبعت ايميل وبيقعد يقول لنا “أنا مش كلب الكتروني”.. دلوقتي بيحدث بيانات ويتكلم كأنه خبير كمبيوتر.. بداية علاقتي بخالد فعلا كانت يوم 30 ديسمبر 2005.. هو اللي بعتلي رسالة عالموبايل قال أن الأمن قفل الشوارع المؤدية للمهنسين.. قابلته في ميدان عبد المنعم رياض وكنا احنا الاتنين شهود على مذبحة اللاجئين السودانيين.. لكن لما مباحث أمن الدولة عذبوا شرقاوي في قسم قصر النيل وبعدها خدوه على النيابة والسجن اتخانقت مع خالد خناقة كبيرة وفضلنا فترة مبنكلمش بعض – أو أنا مبكلمهوش لحد بعد ما شرقاوي خرج من السجن.. هو كان اعترض بشدة على الحملة اللي عملناها لشرقاوي وقال “دي شخصنة ودلع، أي واحد ينزل مظاهرة معرض أنه يحصل له كدة” ساعتها كمان قال انه لو اتقبض عليه مش عايز بانر ولا حملة ولا حاجة

خالد اتقبض عليه في مظاهرة كفاية امبارح وبيت في تخشيبة قسم الضاهر ودلوقتي في نيابة الجلاء على ذمة قضية رقم 1754 اداري قصر النيل – 2007، هو وعشرين معتقل من كفاية متوجهالهم تهم: ن

1. الاشتراك في تجمهر مؤلف من أكثر من خمس أشخاص الغرض منه تعطيل تنفيذ القوانين واللوائح والتعدي على رجال الشرطة وبث دعايات مثيرة وتعطيل حركة المواصلات العامة وتعريض حياة الأشخاص للخطر
2. بث دعايات مثيرة واذاعة أخبار من شأنها تكدير الأمن العام والحاق الضرر بالمصلحة العامة
3. حيازة واحراز محررات ومطبوعات معدة للتوزيع واطلاع الغير عليها تتضمن موضوع الاتهام السالف ذكره
4. التعدي بالقوة والاشارة على موظفين عموميين وكان ذلك أثناء وبسبب تأدية وظيفتهم
5. تعريض سلامة النقل البري للخطر عمدا وتعطيل سيرها

ياللا يا خالد.. سيب النيابة وأمن الدولة والقرف ده واطلع بقى

اقرأ أيضا: خالد عبد الحميد